محمد سقراط-كود///
هاد اليوماين مشيت دربت دورة نواحي مدينة المنزل وهرمومو وبير طم طم وصفرو، هادو مناطق فلاحية ديما كتكون خضرا في هاد الوقت وجبل بويبلان كيكون عامر ثلج وواد سبو دايز بلما ديال العيون والثلج لي كيدوب، ولكن للأسف هاد العام لقيتها بحال الرحامنة، الأراضي لي فيهم الحبوب كلها يابسة وصفرا والزرع ماطوال كاع يالله دار السبولة وهو يقجو الجفاف، وصفرو لي ملقبة حديقة المغرب لقيتها بابسة وواد أكاي لي دايز وسط منها ناشف وهادي أول مرة في حياتي نشوف صفرو بديك الحالة المزرية مدينة أجمل مافيها سواقيها ديال لما لي دايزين من كل درب ولي كيبردو المدينة راه أغلبهم نشف في شهر ربعة، علما أنني كنت كنمشي ليها في الفيجطا في شهر ستة الحرارة ولما موجود، للأسف المغرب كيعيش حاليا الجفاف بكل معنى الكلمة.
ولكن مع ذلك سلوكات الناس في المدن لا تدل على أنهم واعيين بهاد الأزمة المائية لي كيدوز منها المغرب ولي غادي تزيد تتفاقم مع الصيف، وحتى الحكومة ضاربة الطم وعوض تحذر المغاربة وتخلعهم باش يتكايسو على لما، كالسة تطمأن فيهم بحال الى مهتمها هي طمأنة المغاربة بلي راه كولشي موجود والأمور غادا بيخير وكاينة وفرة في المنتوجات غير رتاحوا وتهناو، بالنسبة ليا الوضعية لي كيعيش المغرب دابا من ناحية الشتا لا تختلف على جفاف التسعينات وأزمة الماء في عدة مندن أنذاك بحال طنجة لي كان كيتطلق فيها لما جوج ساعات في النهار وبالليل من تلاتة للخمسة وكيجي في باطو من آسفي، نقدرو مانوصلوش لهاد الحالة ولكن راه قريب، الى بقات الأمور غادا هاكة.
راه خاص من دابا فين مايشعل أي مغربي التلفازة أو يطلق الراديو أو في مواقع التواصل يكونوا اشهارات ونشرات تحذيرية بحال أيام صندوق 111، يذكرو المغاربة في كل دقيقة وتانية أن لما لي كيبذرو فيه دابا راه موحال يلقاوه غير في هاد الصيف نيت ماشي حتى مستقبلا أو في الأعوام القادمة، راه كاين جفاف حاد في المناطق لي من المفروض تكون باردة وفيها لما وتطيح فيها الشتا، راه حتى الثلج قريب يذوب بشكل كامل من جبال كان كيدور فيها العام، يكفي أنه تبعد من الروبيني ديال الدار وتخرج تضرب دورة في خارج المدن ويظهر ليك أن الجفاف حقيقة معاشة، وأن أي قطرة ديال لما كنضيعوها دابا غادي ندمو عليها وصعيب لقاوخا مستقبلا وأن مدن كبيرة يقدر يتقطع عليها لما في الصيف ومع ذلك المغاربة حكومة وشعبا دايرين عين ميكا بشكل غير طبيعي وناكرين أنهم كيعيشو بداية جفاف قاسي.