سهام البارودي- كود//
مقبرة الأب لاشيز من أكبر المقابر ففرانسا و وحدة من المقابر الاكثر زيارة فأوروبا ! كايجيو ليها الناس من العالم كامل يشوفوها حيت أولا مدفونين فيها بزاف ديال ليزانفليونسور فحال الفنان دجيم موريسون و ايديث بياف ! و ثانيا حيت ماشي غير مقبرة و صافي، جردة كبيرة و زوينة واخدة اكثر من ربعين هكتار و ثالتا مزار سياحي كبير، كاتشوف فيه التاريخ د فرانسا … التاريخ د العالم !
تما عرفت بلي كاينة واحد الحاجة سميتها l’art funéraire ! فن الشعائر الجنائزية … ماشي غا جي و حفر و كركب بنادم فحالا دافن اللفت ! لا ! داكشي خاصو يكون على حقّو و طريقو و عندو معايير و جمالية !كيفاش كايتبنى القبر كيفاش كاتحفر السمية وسط الرخام، اغلب القبور فوقهم الورد، تصاور بعض الموتى ، كلمات جميلة خلاوها ليهم الناس لي كايبغيوهم ، كاينين القبور لي فوقهم تمثال د الميت طبعا هادشي كايسوى الفلوس و بزاف د الفلوس و داكشي علاش الناس كايخدمو على راسهم هنا و كايتجاراو فالميطرويات و الطوبيسات مع السبعة د الصباح ماكايصبحوش مكوزين تال الطناش د النهار باش يضمنو حياة كريمة و حتى موت كريم !
تخايل معايا هاد الناس حتى من الموت خلاوها تكون عندها جمالية ! المقابر خلاوها تكون زوينة و نظيفة و مرتبة لدرجة تولي مزار سياحي كايجيو ليه افواج د السياح من العالم كامل يشوفوه و يصوروه ! واش ماشي قمة الحضارة هادي ؟ حتى الموت فيها الجمال و الفن ! بغض النظر على انها قمة الاحترام و التقدير للانسان انه يتدفن وسط هاد الجمال ! قمة الاحترام ليك انك دوز حياتك فتامارة و فالنهاية تموت و يدفنوك وسط تحفة فنية ماشي قبر !
داكشي علاش الگور كايقولو للموتى ديالهم reposes en paix ! ارتاح آ خويا جاك ! ارتاحي آختي شارلوط ! حيت عارفينهم كايمشيو لمقبرة يرتاحو فيها وسط الشجر و الورد و التحف الفنية ! ماشي غايمشيو يدفنوهم وسط الشوك و الزبل فحالي عندنا حنا ! و يجيو يسكرو ليك السكايرية من الفوق فوق راسك و يكملوها و يجملوها شي نهار تلقا شي باطرونة جابدة ليك يديك من القبر باش تكسكس بيها السميدة غليظة !
و زايدينها باكرام الميت دفنه ! تاشمن اكرام عندنا اشمن اكرام ؟ من غير اكرام بنت العبدية