سهام البارودي – كود//
المشكل فالمغرب ماشي هوا الغلا ديال لوطيلات و الريسطورات و الخدمات، المشكل الحقيقي هوا مشكل عقليات بالأساس و هادشي علاش بزاف ديال المغاربة غير كايوصل الصيف كايفضلو انهم يمشيو لاسبانيا و لا دول اخرى يدوزو فيها الصيف!
بنادم باغي الحرية، باغي يبعد على الحضية ديال عباد الله، باغي يلبس كيما بغا و يشرب و يقصر و ينشط في جو ديال الاحترام و الكرامة لي للاسف صعيب تلقاه فالمغرب.
انا شخصيا دابا عشر سنين هادي مادوزت الصيف فالمغرب، من غير الفترة ديال كورونا، و السبب الرئيسي هوا الحرية لي كاتحس بيها فدول اخرى و لي للاسف ماكايناش فالمغرب هادشي و زيد عليه انه فالمغرب كاتخلص أثمنة لي ماكاتناسبش جودة الخدمات و نهار يوقع ليك شي مشكل فشي مطعم و لا شي اوطيل ماعندك ماتصور منهم ! ماكاين لا حماية المستهلك لا عبو الكحل.
مايمكنش ليا نخلي العطلة فإيبيزا و لا ماربيا و لا لاس بالماس وسط اجواء ديونيسوسية، تقدر تعوم بالمايو و العيالات كايعومو بلا سوتيامات گاع و حتى واحد ماكايتسوق الاحترام و النشاط و جودة الخدمات و نجي نتخشى مع عباد الله فعين الذياب و لا شاطئ النحلة وسط الخيام و ليزور فحالا مبحرة فمخيمات الحمادة، هادشي بلا مانهضرو على المطاعم و لوطيلات و السيرڤيس و الأمن و الأمان و بلا مانهضرو على العشوائية لي طاغية على بزاف د المدن السياحية الگارديانات و السعاية و لي باغين بزز يبيعو ليك كلينيكس فالرومبوان ! بنادم فاش كاينوي يدوز العطلة كايكون ناوي يرتاح من كلشي حتى مظاهر الفقر و الميزيريا لي شافها العام كامل.
راه يمكن تمشي غير من الفنديق للسبتة تبحر و لا تمشي لابيسين و تحس بالفرق ! غاتحس براسك وسط دولة متحضرة و شعب متحضر. غير من بني نصار للمليلية كاتحس بالفرق ، البحر نقي و ماكاينش الزبل و كلشي داخل سوق راسو. راه هادشي واخا كايبان صغير لشي ناس، انا شخصيا كايجيني كبير و مهم، النقا، الحضارة، الاحترام، اني نلبس شنو بغيت، اني نقدر نخرج بالليل و مانتعرضش للتحرش و لا لشي اعتداء، اني ماندابزش مع الگارديانات و مالين الباراصولات والسعاية و النصابة لي باغين يخوروني و يضيعو ليا وقتي و الطاقة ديالي و يخسرو ليا ديك العطلة لي انا باغة نستمتع فيها.
المغرب زوين و فيه بلايص واعرين و طبيعة خلابة و لكن هادشي ماكافيش باش يخليني نختار ندوز العطلة ديالي فيه.