سهام البارودي – كود//
انا شخصيا كانشوف اي واحدة كايتفرج فقناة هيام سطار مشارك فجريمة كبيرة ضد الطفولة ! أما هادوك لي واكلين الرملة و عندهم جوج مخاخ و كايسيفطو ليها الفلوس هادوك مسؤولين مباشرين على التعذيب لي كايتعرضو ليه ولادها رتاج و ريان !
كيفاش واحد السيدة مختلة نفسيا، بلاصتها الحقيقية خاصها تكون فسبيطار ديال الامراض العقلية كاتعالج مع گاع عقد الطفولة فكاريان سيدي يحيى و الفقر و الاغتصاب و الزنقة، كيفاش عوض انها تكون لابسة الكسوة مقلوبة فشي سبيطار ! جالسة كاتربي و كاتولد ! و هازة مسؤولية اطفال كاتكرفصهم معاها و تنهصرهم و تمارس عليهم العنف اللفظي و المعنوي و يمكن انواع اخرى د للعنف ماكاتبانش فالسوشل ميديا !
السيدة راها حمقة ، حمقة خاصها تتعالج، و اليوتوب زاد أجج الحمق ديالها ! مؤخرا من بعد ماوقع ليها شي مشكل مع الطليق ديالها خرجات كاتسب و تعاير فواحد الڤيديو المسؤولين ديال البلاد و حتى عاهل البلاد ، و ماخلات سبّان و معيور … هادشي طبعا عادي من انسانة حمقة يمكن مانديوش عليها ! و لكن لي ماشي عادي هوا الدراري الصغار لي كاينين فالخلفية د الڤيديو و لي حاضرين لهاد الصداع و الغوات و السبّان و تهراس الماعن و التشخشيخ… هاد السيدة راه اليوم خدامة كاتصنع لينا المرضى النفسيين ديال غدّا ! اطفال كابرين مع سيدة مختلة عقليا كيفاش بغيتيهم يكونو فالمستقبل مواطينين صالحين ؟! و طبعا هادي ماشي أول مرة ! هيام سطار هي مولات الڤيديو لي كاتقول فيه على بنتها صغيرة عندها ثلت سنين ” آجيو ديوها غتاصبوها” و لي كتبنا عليها قبل !
مافهمتش انا هاد الاصرار لي عند المغاربة مجتمع و سلطات انهم يخليو الولاد مع ماواتهم بزز ! واخا تكون ديك الأم ما فجد أمها مايتلبّق مهم كايقوليه خليوهم مع مّهم راه مهم هاديك ! ويلي واش كاين لي غايبغيهم اكثر من امهم ؟ ايه آ سي كاين لي غايبغيهم اكثر من امهم و حتى الى كان ماغاديش يبغيهم راه غادي يحتارمهم و يعطيهم التيقار و على الاقل فالخيرية غايتهناو من الصداع و الغوات و العنف لي كايتعرضو ليه مع امهم !
و لا صافي غا حيت مهم راها ملاك و ديك الهضرة ديال الجنة تحت اقدام و كدا ! العالم عامر بالامهات المريضات، الامهات الخبيثات، الامهات البسيكوباطات، لي كايعذبو ولادهم و كايجرحوهم و كايجنيو عليهم ! و هيام سطار ماشي أم، هيام غير ولاّدة ! انسانة كاتحمل و تولد فحال القطة !