كود احمد الطيب الرباط ///
اللي وقع فالبرلمان السيمانا اللي فاتت خطير وخطير بزاف. ما عمرو وقع فشي حكومة. برلماني ضوسيه موسخ بزاف اسمو هشام لمهاجري عن حزب الاصالة والمعاصرة. خدا 4 دقايق ماشي باش يناقش الجزء الثاني من مشروع قانون المالية 2023 ولكن باش يهاجم رئيس الحكومة اللي حزبو عضو فيها وعندهم 7 الوزرا.
فوزي لقجع الوزير المنتدب المكلف بالميزانية رد عليه وفرشو فالبلا وقال ليه “اتمنى ان لا يكون هذا الذي قيل باملاءات خارجية”. لمهاجري اللي رئيس لجنة الداخلية فمجلس النواب وراه ماضي كحل. كان خاصو يتحاكم ماشي يكون برلماني. دم الدراري الصغار اللي ماتو ف”مانيج” طنجة ما عمرو يتسنى. اختلاسات اخرى لاسواق كيشرف عليهم مازال ما خلصش الثمن.
لمهاجري كان كيهدر باسم عبد الوافي لفتيت وزير الداخلية. كلشي عارف هاد الشي. هو اللي طلب منو يبقى فالبام باش كان مشى بصاح من الحزب قبل اخر انتخابات تشريعية وكان التاحق بالتجمع الوطني للاحرار اللي كيسب فرئيسها اليوم.
دابا المشكل لكبير هو وزير الداخلية. ما بقاش مكلف بخدمتو ولى كيدير السياسة بلا خبار اللي حاطينو فالبوسط.
اليوم لفتيت خاصو يمشي فحالو. خاص رئيس الحكومة يطالب بتعديل حكومي اني. هادا وزير خربق اللعب وولى طرف فوقت حساس كتعيشو لبلاد.
اش من ثقة بقات بينو وبين الحكومة باحزابها الثلاث المشكلة للائتلاف.
استمرارو كيعني ان شي حاجة خايبة غادية توقع وتشعل لبلاد وديك الساعة العافية ما يمكنش تشعل غير فطرف. راها غادية تشعل فكلشي.
هادي سيمانا حاسمة. خاص لفتيت يمشي من الداخلية ويلتاحق بشي حزب وديك الساعة يدير السياسة. راه عندو عرام لحزاب غير يختار