سهام البارودي – كود//
داك الحديث ديال ” كيفما تكونو يولّى عليكم ” راه كاين و كايبان ليا انا فشحال من حاجة حتى فالممثلين ! دابا ميريكان مع شعب كايتقاتل من اجل الحرية، عندهم ممثلين بزاف كايشبهو ليهم معروفين بدفاعهم على الحقوق و الحريات و كايعاونو البلاد تزيد القدّام ماتبقاش محكومة بقوانين متخلّفة ! فحال مارلون براندو لي كان معروف بالدفاع ديالو على حقوق السكان الاصليين و السّود ! تيم روبينز لي معروف بأنه كايدافع على الحريات ! ففرانسا عندهم ايزابيل ادجاني ، النگالزة عندهم ايان ماكيلين ! و بزاف بزاف د السميات كايدافعو على المساواة فالحقوق بين الرجال و العيالات و بزاف كايدافعو على حقوق المثليين عبر العالم و بزاف كايدافعو على حرية التعبير … هادو الناس المرضيين !
حنا لا ! حنا مساخيط ! حنا عندنا ممثلين فحال انس الباز ! فين ماكاين شي تخلف و شي افكار ظلامية كايجيو يدافعو عليها بوجهم احمر ! ماكايحشموش ! المجتمع اصلا مفوندي ! غارق وسط الجهل و الخرافة و الافكار ديال القرون الوسطى ! كاين مازال ناس تقدر تسلخ واحد حيت لقاتو كايشرب الما فرمضان ! مازال عايشين معانا اوباش ضربو بنت فأگادير حيت شربات الما غير هادي واحد العاماين و هاكاك بوجهو احمر كايزيد الممثل يرسخ هاد الافكار !
ماعارفش هوا اصلا شنو هي الحرية و الحق فالصيام و لا الافطار فرمضان ! ماعارفش هوا اصلا بلي كاينة علاقة وطيدة بين الفن و الحرية! و الله يماك و ماتكون الحرية لاقدرتي تمارس الفن ! وا شوف غا فاش خرج فيلم كازا نيگرا راهم ناضو ليك صحاب الفن النظيف حيحو عليك و قالو ليك بلي داكشي غا عفن ووسخ و ماكرهوش كون كانت عندهم سلطة و الله اتا يحيدوه من السينيمات ! و فشي دول اخرى فيها بزاف د الناس فحالك ماكايدخلوش سوق راسهم و كايبغيو يفرضو الصيام و الصلاة و اللباس و الماكلة على عباد الله راه يقدرو يعلقوك من رجليك و يجلدوك على داك كازا نيگرا و اللقطات د البوسان و التمحكيك و تخسار الهضرة !
ماعارفش نتا بلي لاتبعناك فديك الافكار الغاملة ديالك و قلنا للسيدة تخباي عاد فطري فرمضان باش ماتجرحيش مشاعر الصائمين ! راه خاصنا نقولو ليه تاهوا تخبّى لابغيتي تبوس فشي فيلم ! و لا عرفتي شنو ؟! اصلا راه ماخاصكش تمثل ! شنو هوا التمثيل ؟ هاداكشي سميتو الفسق و الفجور و العياذو بالله ! عجباتك هاد الهضرة ؟
آ حنيني ! ديك السيدة لي شفتي فالسطاسيون راها حرّة تفطر و تكمي ! ماشي سوقك فيها ! اش حرگ شطاطاتك نتا ؟! واش بغيتي تفطر تشهيتي تاكل ؟! وا كول ! بغيتي تشعل تانتا شي گارو ؟ شعلو ! شعلو و كمي مع راساتك و رتاح فين كاين المشكل ؟
و الله حتى ديك ” كيفما تكونو” كاينة نيت ! لاكان عندك شعب فيه بزاف د الناس ماكايدخلوش سوق راسهم و ماكايآمنوش بالحريات راه غايكونو عندك ممثلين تاهوما ماداخلينش سوق راسهم تابعين العيالات هادي فطرات هادي صامت !