كود هناء ابو علي ///
تصرف خطير وغير مسبوق من حركة “حماس” المصنفة من قبل دول غربية كحركة ارهابية٬ اتجاه المغرب. زعيمهم خالد مشعل اللي عايش ملك فقطر ما قدرش يهدر علي التطبيع اللي دايرو اميرها مع اسرائيل وكيحل فمو على بلاد بحال المغرب. مشعل ففيديو بوقاحة خاطب لمغاربة. عقلتو نهار خاطب ماكرون رئيس فرانسا لمغاربة اش وقع ليه. كاين غير واحد اللي كيوظف هاد العبارة ديال اخاطب المغاربة هو رئيس الدولة الملك.
مشعل ماشي غير خاطب لمغاربة وبدا بصحابو الاسلاميين باش قال “اخاطبكم في المغرب. في خطوة يستطيع المغرب ان يقوم بها. ادعو اخواتي. الجماهير.ادعو القوى الاسلامية” قالها =الاسلامية= هي للولى حقاش كيخدمو بيها. عاد زاد و”الوطنية” …. ان تخاطب قيادة البلد غيرة على المغرب. غيرة على مصالحه وامنه .وغيرة على فلسطين”. يعني هاد السيد اللي فقطر كيعرف امن بلادنا كثر منا. راه تهديد واضح باللي ايلى ما درتوش وقف التطبيع مع اسرائيل غادي نهددو امنكم من خلال ناسنا.
مشعل اعتابر قطع العلاقات مع اسرائيل ووقف التطبيع وطرد السفير اي طي الصفحة كيف قال غادي يكون خطوة كبيرة وورقة ضغط.
ورجع للتطبيع وقال باللي “خا خارج السياق الطبيعي لدولة محترمة كالمغرب”.
مشعل اللي ما كيعرف لا مصالح المغرب ولا اولوياتو كيوهم كلشي باللي حماس هي فلسطين والواقع ان هادو جوج امور لا علاقة بيناتها.
هاد القيادي اللي ما عمر حركتو اعترفات بمغربية الصحرا كيهدد بلاد وكيقول حيدو التطبيع ووقفوه غيرة على مصالح بلادنا وامنها. هاد الامن اللي كيهددو ضمن ما يهدده ايران ماشي اسرائيل. ايران الراعي الرسمي لحماس واللي فنفس الوقت راعية وداعمة للبوليساريو
السي مشعل نسى عليك المغرب. بغيتي تحيد التطبيع وبدا بالدولة اللي عايش فيها. ايلى عندك الجرأة غير حل فمك وجبد هاد الشي فالدوحة ماشي توظف بيادق ديالك هنا باش تبغي تنوض البلبلة. مزيان هاد الشي باش نشوفو اش من موقف غادي يكون عند هادوك لبيادق ديالو فالمغرب من الاسلاميين وبقايا القومية