محمد سقراط-كود///
حتى لين غادي يبقى يضحي المغرب بخيرة شبابه كيموتوا كل مرة بسباب الشراب المغشوش، حوادث كثيرة وكتعاود كل مرة وباقي لحد الآن الدولة مابغاتش تدير حد لهاد المآسي المتكررة، مواطنين مغاربة كيصبحوا مليوحين أموات بحال الى راهم ماشي باشار ومعندهم لي يسول فيهم، عار هادشي وعيب وكتحمل المسؤولية ديالو الدولة لي مخلية الفراغ للگرابة والمجرمين يبيعو الشراب مغشوش للمغاربة، عوض ترخص لپيسريات قانونيين يبيعو الشراب وتدعم الماحية مشروب الدرويش، وعادي تكون اول مادة في تاريخ المغرب لي كتدعمها الدولة من اجل المزاليط وماغاديش يستافدو منها المرفحين على عكس المواد الأخرى لي كتدعم الدولة ولي كيستافدو منها غير المرفحين.
هاد الحوادث ديال الموت الجماعي بالشراب المغشوش في الغالب كتوقع في مدن مافيهمش بيسري ديال الشراب او المدن الصغيرة والفقيرة ، بحال شفشاون والزغنغن والحاجب والقصر الكبير ، ومن غير القتلى راه كاين لي مشا ليهم الشوف عدد كبير والدولة ليومنا هذا ماقدراتش تتحرك وكتشوف في الشباب المغربي كيموت ويضيع هكاك بالشراب المغشوش والماحية الجاهلة.
هاد الدراري لي ماتوا في سيدي علال التازي اغلبهم شباب في عمر الزهور ماشي مشردين او كويلات، شباب بغاو ينشطو ويفرحو لفوز الريال حتى صدقوا ميتين جماعيا، خاص الدولة تعلن حداد على أرواح ضحاياها وضحايا القوانين الجائرة لي كتجرم بيع واستهلاك الخمور للمغاربة المسلمين، ولي كتقيد رخص بيع الخمور بقوانين وشروط كثيرة البعض منها اعجازي، خاص يكون في كل فيلاج پيسري ديال الشراب والى تقديتيه مايحيدوهش ليك الجدارمية ومايبتزوكش بيه الصقور، وخاص الدولة تدعم ماحيا كمشروب محلي موجه للطبقات الهشة على الأقل ماغاديش يزاحموهم فيه المرفحين بحال كي مزاحمينهم في البوطة والسكر وباقي المواد المدعومة.