محمد سقراط-كود///
فاش كنت طفل صغير في مدينة طنجة قالو ليا بلي الشمال هو من العرايش وبالظبط من الديوانة دالعوامرة حتى للناظور، فاش كبرت قالوليا بلي الناظور راها في الشرق وماشي شمال واخا في الخريطة كتبان شكال، وأن الشمال هو من الفنيدق حتى لمارتيل والى كبر يوصل لوادلاو ، وطنجة ماشي شمال حيت كانت فيها ماروخا كتباع بنفس الثمن لي كتباع بيه في فاس او مكناس، وأن العرايش معندها علاقة بالشمال وعمرك تسمع شي حد كيسول على شحال داير لكرى فيها أو واش كاين مخيمات او شحال دايرة الماكلة تم ، او شي حد كيعاود على العطلة لي دوز في العرايش عمرك تسمع هادشي كأن العرايش حفرة غي قاع المغرب، بينما هي مدينة ساحلية تاريخية عندها قصبة واسوار وفيها گاع المقومات باش تكون سياحية لكن للأسف راها دايرة بحال ريصانة جات على البحر.
وحدة من أجمل مدن العالم في وقتها كانت هي ليكسوس و لي كانوا كيعتابروها الفنيقيين قطعة من الجنة راه جات على الظفة الأخرى من العرائش لي براسها راه جات على ظفة الواد والبحر وجنب الغابة عندها گاع المؤهلات باش تكون مدينة سياحية مهمة، المدينة لي طلب جان جينيه يتدفن فيها هو والعديد من المشاهير لي تفتنو بجمالها ومع ذلك هاهي حاليا كاع ممستافدة من هتد الاقلاعة الحضارية والاقتصادية لي واقعة في مدن الشمال، تشوفها تقول هادي غير شي مدينة بين فاس وتازة منسية في منطقة مغضوب عليها.
راه حتى العرايش مدينة شمالية وخاص تستافد من هاد الرواج والنهضة الاقتصادية وتحول شواطئ العرائش لوجهة لجميع المغاربة وماتبقاش خاصة بقصراوة فقط وتستافد من الفلوس الكثيرة لي تحطات في طنجة وتطوان والمضيق وباقي الجهة، راه لا يعقل ان العرايش من اعرق مدن المنطقة واجملها تبقى مهمشة ومنسية لدرجة عمرك تسمع شي حد كيهدر عليها وماعندهاش حتى الربع ديال الزخم والرواج لي عند مارتيل مثلا علما انها مدينة بشاطئ وجديدة وغير حومة تطوانية على عكس العرائش لي أصلا راه بحالها بحال الرباط نفس الموقع والشكل غير الزهر والو ، والمسؤولين لي ينوضو بهاد المدينة العريقة.