محمد سقراط-كود///
كيفاش الدولة المغربية كتشجع الكرابة ديال الشراب يخدمو على راحتهم ويراكموا الثروة وكتوفر ليهم الظروف المناسبة باش يحتاكرو السوق لمدة طويلة وفي اللخر تدعي أنها تحاربهم بينمات قوانينها الرجعية هي لي خلقاتهم، واش كاين شي إحتياج للكراب مادام الشراب كيتباع قانوني في أي بلاصة وفي كل وقت، واش الدول لي الطاسة فيها مطلوقة كيحتاجو الكراب، علاش مشروب روحي كيتصنع في المغرب والمادة الأولية ديالو كتزرع في المغرب نيت وكيتباع فيه ومع ذلك محتاج كراب باش يقدر يسوقوا، راه كروان وبولعوان خاص يكونوا كيتباعوا عند الحانوت مع الخبز والبيض والزبدة ويتحطو جنب القراعي ديال لما، علاش خاص أماكن مخصصة وتشري بالتخبية وماتاخدش التيكيت ديالك والباب منين كيخرج الزيت والطحين والسكر مايخرجش منو الروج بيو مع أنه أقل ضرارا صحيا وهادشي مثبت علميا في مختبر موقع كود.
هاد الأيام قبل العيد ومن ورا العيد فين كانو البيسريات سادين والمغاربة واحلة ليهم الشحمة في القرجوطة مالقاوش باش يهضموها واخا غير شي أماريتو ولا ياغر مايتر بالعشوب والحبة السودة، راه كان الزحام على الكرابة والثورة نايضة عليهم ماحبسوش من البيع والشرا ليل ونهار راه غير مداخيل هاد الأيام تخدم عليهم على لفاتح محرم عاوتاني، وهادشي ماشي منطقي وماشي معقول أن الدولة لي خاص تفرض على أي حاجة تكون قانونية في البلاد هي لي كتوفر الظروف المناسبة فين ينتاعشو البزنازة والكرابة باش يخدموا ويكون عليهم النفاذ ويديرو لاباس ويتسببوا في موت العشرات من المغاربة بحال لي وقع في مكناس والقصر الكبير والناظور والحاجب وهادشي بسباب قرارات معندها علاقة مع الدين الإسلامي ديال المغاربة بل هادي قرارات ناتجة على فهم الجنرال الليوطي للإسلام من منظور كولونيالي.
راه معندها معنى أو منطق أن الشراب يتباع العام كامل وفاش كيحتاجوه المغاربة في الأعياد والمناسبات كيتمنع وكيبقى الكراب هو الملجأ الوحيد للشعب باش يهضم الشحمة دالصردي لي واكل علف الدجاج، هانوا قوانين خاصها تبدل لأنها فقط كتساهم في إنتعاش السوق السوداء ومراكمة الثروة عند المجرمين والبزنازة باش يسيبو ويلقاو باش يفاصلو على راسهم وباش يغريو رجال السلطة والأمن ويدفعوهم دفعا للسقوط في خطيئة الرشوة، وهادشي الدولة كتساهم فيه بهاد القوانين راه خاص الشراب يولي متوفر للمواطنين العام كامل كي العيد كي بلا عيد ويتحاربو الكرابة والبزنازة وتعطى الرخص ديال البيسريات في أي حومة وأي مدينة في المغرب عوض هاد الحالة ديال الحماق والترقب والتوجس والسؤال الأنطلوجي ديال واش طلقوا الشراب ولا باقي.