سهام البارودي كود /////
بزاف ديال الفنانين و الرياضيين و المشاهير فالعالم كانو راس وولاو رجلين حيت خرجات عليهم شي فضيحة لي خنزات صورتهم قدام النّاس، و النورمال ففحال هاد الحالات انه داك المشهور كايلبّدها و كايدخل سوق راسو و كاتكون ديك الفضيحة إعلان ديال لافان د كاريير ديالو.
الانسان العادي فاش كايدير شي فضيحة و لا جريمة، نقدرو نعتابرو انه العواقب ديالها كاتخصُّو غا هوا و المحيط المحدود ديالو، كايدوز حبسو و فاش كايخرج يقدر يدير شي طريبورطور ديال المبادرة الوطنية للتنمية البشرية و لا شي كروصة د البنان فشي سويقة و لا عين شافت لا قلب وجع.
و لكن الفنان ماشي شخص عادي، بل “واجهة” و “صورة” ، نهار كاترتابط الصورة ديالو بشي فضيحة و لا جريمة فراه ماعمر ديك الصورة كاتصلح و ترجع كيما كانت. فحال مثلا تايگر وودز البطل العالمي لي خرجات عليه فضيحة ديال الخيانة و العلاقات المتعددة ف2009، و هادي غير فضيحة نقدرو نقولو عليها “اخلاقية”، يعني ما تشد، ما تحاكم مادوز حبس و وواخا هاكاك هاد الفضيحة الاخلاقية كانت كافية باش الصورة ديالو تتدمر و يفقد العلاقات ديالو و عقود الاشهار لي كانت بملايين الدولارات! حيت شركات فحال نايك و جيليت ماغاتبغيش تربط صورتها بواحد مشوّه ! و هذا غير مثال من بين بزاف ديال الامثلة ديال فنانة كبار و مشاهير مشاو ليهم ادوار و مابقاوش كايعيطو ليهم المخرجين و مغنيين فقدوا عقود مع شركات انتاج كبيرة ….
حيت حتى شي شركة بعقلها ماغاتبغي تربط راسها و سميتها و صورتها بصورة انسان مشوّه و لا مجرم !
وا دابا شوف آ ولد عمّي ! شركة فحال جيليت كادّير غا مّاكن ديال الحسانة و تاهي مارضاتش الصورة ديالها ترتبط بواحد عندو فضيحة اخلاقية ! نايك كادير غا التقاشر و القبيات وفسخات العقد مع تايگر وودز ماعطلاتوش ! و حنا ؟ حنا بلاد على قدها، منظمة حدث عالمي كبير، و باغا تسوق لراسها كبلد حقوق المرأة و عندها ملك كايدعم هاد المسار بالمدونة و بالقوانين و بالاجراءات باش يا الله يا الله المرا تولي تاهي بنادم فهاد البلاد و شكون جايبين لينا يغني بمناسبة الكان ؟
سعد المجرد لي مدوز الحبس و متهم بالاغتصاب و العنف و استعمال الزّق كايغني فتظاهرة رياضية هههههه ! واش ماشي المسخ هذا ؟
سعد المجرد تصرفو فأي دولة كاتحتارم راسها غاتلقاه ساد على راسو فشي فيرمة كايربي قنية و لا داير شي “هجرة روحية” للهند و لا بالي عاطيها للميديتاسيون و الاستغفار و مخبي على الشهرة و الاعلام حشمان من شنو دار ! و لكن فالمغرب ريضوان جابو لينا عاوتاني خلاوها الگور باش يرقع ليه البكارة “الاعلامية” ديالو
Pour lui refaire une virginité
و يغني فتظاهرة مهمة، واجهة ديال البلاد !
حشومة المغرب يحط فالواجهة ديالو إنسان متهم بالاغتصاب ! راه صورة البلاد هاديك و القيم لي باغين نسوقو ليها، كاس افريقيا راه خطاب موجه لافريقيا و للعالم، و الخطاب ماشي غير بالتيرانات المجهزين و الجمهور و الكرة و اللعب، الخطاب حتى بالناس لي كاتختار باش تمثلّك و تغني ليك فحدث مهم فحال هذا.
باش يغني سعد المجرد فحدث كبير فحال هذا راه استهتار بالضحايا و إهانة للبلاد.