كود سبور مصطفى الشاذلي الرباط ///
بزافت الامور ماشي حتى لهيه فالكوة المغربية. حسب مصادر “كود” فان قرار غريب مثير خدامين عليه فالعصبة الوطنية لكرة القدم الاحترافية وباغيين يطبقوه قبل ما تبدا البطولة. هاد القرار كيتعارض اصلا مع قوانين لبلاد. اش فيه هاد النص الجديد اللي باغيين يدخلوه؟ .
فيه ان الجمهور ايلى سب الجامعة او رئيسها او شي شخصية غادي يتعاقب النادي ب2 ماتشات ويكلو.
ايلى داز هاد القانون راه المتضرر الاول منو هو رئيس الجامعة. راه ضربة للخدمة الكبيرة والتاريخية اللي كيديرها.
السبان ما يمكنش يتوقف فماتشات البطولة الوطنية. كون قالو ايلى ترفعو تيفوات او لافتات. هاديك ممكن. راها كتبة وفيها سبق اصرار. ولكن غير السبان راه تخربيقة كبيرة.
واجيو تشوفو جواب الحسن الثاني على تعليق البطولة الوطنية. قصة تفيد صحاب العصبة الاحترافية. ف 9 دجنبر 1979 وفالتصفيات المؤهلة لمونديال موسكو 1980 خسر المنتخب المغربي لكرة القدم مع المنتخب الجزائري ل5 لواحد وكان خسر بالذهاب بالجزائر ب3 لزيرو. جا رئيس جامعة كرة القدم عند الملك الحسن الثاني وقال ليه غادي نوقفو البطولة الوطنية عام كامل باش نقادو هاد اللعبة. الملك رد عليه بما معناه واهادوك اللي كيگولو “وا لاربيط وا مسخوط الواليدين كل سيمانا فالتيرانات٬ على من غاديين يقولوها ايلى حيدتي البطولة. طبعا البطولة بقات والحسن الثاني بحال اليوم عارف باللي التيرانات وسيلة للتفريغ. خاص يتعاير شي حد باش ما يعيروش الدولة ورموزها. باش ما يعايروش الحسن الثاني.
هادي قصة خاص العصبة تستحضرها فاي قرار غبي.
دابا ايلى قررتي تعاقب الفرقة ايلى عايرات اكس او اگراگ٬ اش غادي دير العصبة ايلى مدينة بحال كازا او الرباط او طنجة او فاس كلها تلطخات بكتابات كتسب هادو اللي ما باغينهمش يتعايرو.
نتمناو يكون شي حد يدير ليهم عقل. راه كيلعبو بالعافية.