احمد الطيب كود الرباط ///
هاد ليام سفير السعودية في الرباط وسميتو سامي بن عبد الله الصالح دار عراضة للصحافة المغربية. عادي من حقو يدير التسويق ليه ولمملكتو اللي تعرضات لهجوم كبير بعد عرض الفيلم الهندي مؤخرا “حياة الماعز”. مستمد من سيرة ذاتية لعامل هندي جا يخدم لقى راسو مملوك لسعودي كيسرح الماعز.
عادي سفير هاد الدولة اللي مازال خدامة بحالها بحال شي دول خليجية اخرى بنظام الكفيل. نظام العبودية وصافي.
عادي يعرض على الصحافة باش ينسي جريمة قتل الصحافي السعودي المعارض جمال خاشقجي بقنصلية السعودية باسطمبول التركية بعد تقطيع جثتو بالمنشار فجريمة هزات العالم.
لكن العقلية الذكورية ديما غالبة عند هاد الديبلوماسيين. الصورة اللي كيحاول يسوقها محمد بن سلمان على دولة باغية تنفاتح كذبها ليه هاد السفير سامي بن عبد الله الصالح. صورة ذكورية بحال ايلى الاعلام المغربي ذكوري ما كاينش فيه حتى مرا. صورة تحتاقر دور الاعلامية المغربية. راه يا السي السفير الامي اللي ما كتعرفش تاريخ هاد لبلاد٬ المغرب بناوه نساء وفبعض الميادين قبل الرجال. كان عليك او على دولتك تقريك شوية تاريخ المغرب اللي ماشي عمرو 12 قرن كيف كيسوقو صحاب المد الوهابي والاسلاميين والعروبيين٬ بل اكثر بكثير. فهاد التاريخ حكموه نساء سواء الكاهنة داهيا او لعبو نساء فظهور امبراطوريات كيف ما دارت زينب النفزاوية مع المرابطين او لعبو دور فاشعاعو العلمي كيف دارت فاطمة الفهرية مؤسسة القرويين.
هاد التاريخ مسحتيه يا السفير الذكوري باش بنتي فصورة بلا اي صحافية. الصحافيات فالبلاد موجودات. مديرات نشر وصاحبات مقاولات ومديرات تحرير. فجميع الميادين
بعيد على هاد الشي٬ باش خرجتي كتقول العلاقات المغربية السعودية نموذجية٬ على من تكذب. ما نموذجية ما والو. النموذجية هي العلاقات المغربية الاماراتية. بلاد بن سلمان مازال ما فتاتحاتش قنصلية فالعيون او الداخلة. نهار تفتاتحها هدر علي هاد النموذجية
