سهام البارودي – كود//
والله الى مرضاتني القصّة ديال ديك البنت لي عندها حداش لعام و تكرفصو عليها دوك المجرمين! ثلاتة ديال الوحوش بشلاغمهم كايتعداو على بنت قروية صغيرة اصلا الوقت معدية عليها خلوق ! بحكم الظروف لي تزادت فيها و المدرسة لي ماكاتمشيش ليها و الزلط و القهرة و العروبية و تيفلت اش بغاو عندها دوك الوحوش! اش بغاو عندها ؟و لَي مرضني اكثر هوا الحكم القضائي لي شوهة ! شوهة و فضيحة قضائية و اخلاقية و انسانية و مجتمعية و لي بغيتي !
كيفاش ثلاتة يتعداو على طفلة و يعاودو يتعداو عليها و يعاودو يتعداو عليها و يهددوها بالجنوية و يحتاجزوها و يفتضوا البكارة ديالها و تحمل من واحد منهم و يتحاكمو بعام و نص ؟! عام و نص ديالاش ؟! واش ديال التكرفيص لي كرفصوها ؟ مستقبلها لي ضيعوه ليها ؟! سمعتها لي وسخوها ليها فالعروبية وسط ناس الدوار؟! الاعاقة النفسية لي غاتعيش معاها حياتها كاملة ؟! الخوف ؟ الفوبيا ؟! المرض ؟ الذكريات السوداء لي غاتكبر معاها ؟! ريحتهم الخانزة لي غاتكون لاصقة ليها فنيفها ؟! عام و نص ديال داك الدرَي لي غاتولدو من اغتصاب من أب بيدوفيل مغتصب ؟! ديالاش ديك عام و نص ؟! حيت منين مابغيتي تقراها غاتلقاها مامخرجاش ! عام و نص راه معيورة ! سبّة فحق القضاء المغربي و الدولة المغربية لي عندها أميرة لالة زينب على رأس العصبة المغربية لحماية الطفولة و لي الملك ديالها كايشرع قوانين باش يحمي المرأة و الطّفل !
فالدول لَي كاتحتارم راسها فحال هاد الجرائم راه مّاليها كايتسماو “مفترسين جنسيين” كايدوزو تصاورهم فالاخبار و كايشوهو باباهم باش يعيشو حياتهم كاملة منبوذين و بنادم داير منهم آطونسيون ! و كاتسمع غا عشرين ثلاتين عام د الحبس ! حيت هادي ماشي سرقة بزطام و لا واحد خاون گرصون فازگ من السطح … الاغتصاب و ما ادراك ما الاغتصاب ! سرقو من ديك البنت طفولتها و براءتها و شوف من هنا القدام كي غاتولّي حياتها !
كيفاش واحد شرب الما فرمضان حيت جاه العطش يدوز الحبس حدا واحد بيدوفيل مكرفص على درية عندها حداش لعام ؟! اينا قانون و اينا بلاد هادي !
ولكن هادشي كايدل على انه مازال كاين تساهل مع هاد الجرائم فحال الاغتصاب حتى من طرف هادوك لي خاصهم يطبقو القانون بصرامة ! ماكايعتابروش بلي انك تكرفص طفلة مرة و جوج و ثلاتة و تجبد عليها جنوي و تهددها و تحمّلها جرائم بالبشاعة الكافية لي تخلي مولاها يمشي يغبر فالحبس ! لا عام و نص فحال البيدوفيل فحال واحد كايضرب البزاطم ! فحال البيدوفيل فحال واحد شافر بشكليطة ! فحال لي تكرفص على بنت صغيرة و دمّر ليها حياتها !
هادشي فات الحگرة لهيه !