كود سبور ميلبورن ///
فكل حدث رياضي كبير كيخرجو شي وحدين ما عندهم علاقة بالكورة كيربحو منو لفلوس وكيفوجو. شي حد اسمو سعد جابو شي حد فالدولة مع شي وحدة ولصقو لمرات جو بايدن. دار ليها “گيد”. هنا انتاحل مهنة كينظمها القانون وهي مرشد سياحي. كان “فو گيد” كيف كيدير ديما.
دابا هاد السيد مع رباعة من ربعة رهوط. جوج رهطات وحدة ممثلة ولخرى شي تخربيقة اخرى وجوج رهوطا. قناة عمومية اسمها “دوزيم” رفضات ترسل صحافييها لهاد الحدث. رسلات صحافي فالرياضة واخر من موقع القناة وكاميرامان وما بغاتش ترسل كثر واخا الحدث يستاهل وفضلات ترسل هاداك سعد اللي كيدافع عليه شي حد فالدولة.
ماشي غير رسلاتو. رسلاتو وعطات لشركة ديالو. اييه. انتاج شي تفاهة اسمها الفرقة. يعني مفوج وراجع بالفلوس. ما عمر “دوزيم” وصلات لهاد الحقارة وهاد الدناءة. ما عمر هاد القناة اللي كانت رائدة فالرياضة قبل سنوات٬ رجعات كتجيب كلونات. تصورو الماتش اليوم سالى ب6 لزيرو وهاد لكلونات كيشطحو وينقزو خارج الملعب المستطيل بميلبورن.
هادو ماشي غير كيتعداو على كرامة صحافيات وصحافيي دوزيم. راه وجودهم اهانة لبلاد كلها. كيشطحو وكينقزو ولالمانيين اللي رابحين ب6 كاعيين. واحد فيهم سولاتو “كود” علاش ما عاجبوش الحال. قال باللي كانو يربحو باكثر وما ربحوش. ما عاجباش النتيجة. واييه.
هادو كون كيفهمو الكورة. كيعرفو اش كتعني. كيدخلو للتيرانات. ما يديروش هاديك الحالة. اللعابات كيف شافتهم “كود” بعد الماتش كانو منهارات. بصاح منهارات. بكاو. باينة فعينيهم. دارو جهدهم ولقاو منتخب كبير.
نرجعو للرباعة. كيفاش دوزيم” تسمح لهادو ينتاحلو صفة صحافي. كيفاش المنظمات المهنية ساكتة على تجاوز هاد القناة لهاد المهنة. دوزيم فيها متعاونين ما تخلصوش هادي مدة وعندها لفلوس تخلص هاداك سعد وصحابو.
اش كيدير مدير الماركوتين فالقناة فاستراليا.
تا راه ما بقاش لحيا. كلشي كيدير اللي بغى. دابا هاديك هند جبارة اللي كيدير شوية التمثيل اش لاحها للصحافة. اش داها تسول سفيرة. وهاديك السفيرة ما حشماتش تعطي تصريح لوحدة منتاحلة صفة.
ادارة القناة مسؤولة على هاد الجريمة اللي كدار فحق الصحافة.
بغيتو لبلاد يسيروها بحال سعد عطيوها ليهم. ديك الساعة غادي يضربنا الضو حقاش ماشيين للحيط. خاص كلشي يتحرك باش يوقفو هاد الجريمة اللي كدار فهاد لبلاد. ضد هاد المهنة. صحاب المهنة عندهم مسؤولية فهاد الشي. كيسولو صحاب هاد الرباعة وكيستجوبوهم. هاد النتيجة