محمد سقراط-كود///
في الدار البيضاء شفت لأول مرة بقالة صغار في الأحياء ولكن تابعين لكارفور عبارة على ميني ماركت قياس البقال ولكن بالنظام ديال الأسواق الكبرى كتدخل تهز شنو بغيتي وتخلص في لاكيس، فاش شفت أول مرة واحد عجبني ومن بعد شفت التاني والتالت وسولت واحد فيهم قاليا تابعين لكارفور، تما عرفت بلي هادو هوما القتالة ديال البقال غادي يبقاليه فقط التعامل بالكريدي والعلاقة الإنسانية لي كيربط مع الناس والى قادر ينقص في الثمن وسط هاد المنافسة، أما من غير هادشي كتبقى تجربة التسوق من الميني ماركت حسن، أولا مكتهدر مع تاواحد وممحتاجش تبقى واقف وكتفكر في شنو خاصك أصلا، تانيا كتقدر تقارن بين المنتوجات وتختار وهادي مهمة بزاف كتحسس الواحد بلي عندو خيار على عكس باقي مواقف الحياة.
حيت الحانوت كيبيع ليك لي عندو ماشي لي باغي نتا، أغلبية الحوانت كتقوليه مثلا عطيني واحد ايزابيل كيقوليك كاينة غير طام مثلا، عطيني عافية كاينة غير ويلور عطيني الذرة جوفير كاينة غير البركة عطيني عين سايس كاين غير عين افران، كيبيع ليك لي عندو ماشي لي باغي نتا بحال الى غير كديباني وصافي على ماتقدى شنو باغي من بلاصة خرى، وهاد الطريقة ديال التسوق غادا للإنقراض، إلا في الأحياء الشعبية حيت الى فتحتي ليهم المحال ودخلوا ختارو شنو بغاو راه غادي يديوه بلا خلاص وغادي تبقى لا ربح لا راس المال.
على مايبدو أن البقال المغربي الى مطورش المهنة ديالو راه غادي للإنقراض خصوصا في مراكز المدن غادي يولي النموذج هو الميني ماركت ومن الأحسن يكون مغربي عوض شركة أجنبية، لذا راه خاص البقالة يطورو طريقة خدمتهم حيت النمودج القديم راه فيه منافسة كبيرة وحاليا الأسواق الكبرى مابقاتش في مخارج المدن راها غادا وكتخلق نمادج مصغرة دخلات بيهم لكاع الزناقي والدروبة وأصبحت جنب الى جنب مع مول الحانوت، موشكيلتهم فقط أنهم مكيديروش الكريدي لي أصلا فيه مخاطر كبيرة لموا الحانوت وشحال من واحد طب في راس المال فرقوا على الناس كلاوه ليه.