محمد سقراط-كود///
فاش كتعطي الدولة أرقام على نقصان الهجرة السرية في المغرب مكتعنيش أن الرغبة في الهجرة مابقاتش عند الشباب، وانما فقط الدولة نجحات في حبس هاد الفئة بالقوة في المغرب، عوض الدولة تحارب مسببات والرغبة الملحة للشباب في الهجرة، وتحسن من ظروفهم الاجتماعية، كتنوض تشدد عليهم الخناق وصافي وكيوليو يختارعو شي طرق عجيبة للهجرة، بحال لي كيمشيو على تركيا والبلقان وكيدوزو على اخطر المناطق في العالم سواء من ناحية الاخطار الأمنية او من ناحية الاخطار الطبيعية، راه رحلة كيديروها غير المغامرين الشداد أو بنادم لي فاقد الامل في بلادو هو لي يقدر يقطع دوك البلدان كلها باش يوصل للجنة الأوروبية.
حاليا راه الهجرة ماشي كاينة غير في الحدود مع سبتة او مليلية كاينة تقريبا في المغرب كامل، ديما كيتلقاو قوارب الهجرة خارجين من كاع الجهات في المغرب من الشمال للجنوب، وحاليا الصحرا راه بحال محطة ولاد زيان دالحريك راه بحال نواحي القصر الصغير في التسعينات، كاين فيديوات ديال الحراكة كيعرفو المهاجرين براسهم ومناطقهم وكيعطيو كود باش يتعرفوا بلي راهم وصلوا وبلي السيد لي حرگهم معقول، كتلقى في نفس الفلوكة مغاربة من المغرب كامل من غير الرباط طبعا، والصراحة كتسمع بزاف المدن الصغيرة والبوادي، بحال زايو.. تارگيست.. اعروي.. موزار.. كرسيف.. كلميم… جرادة… تينغير.. كتلقى كاع جهات المغرب ممثلة في فلوكة وحدة، اكبر حزب سياسي في المغرب وميقدرش يجمع تمثيلية بحال هادي.
أغلبنا كيعرف حالات كثيرة ديال شباب كانوا لا خدمة لا ردمة هنا وفاقدين الامل والمستقبل مسدود قبالتهم، وهاجروا ونجحوا في حياتهم وكاين لي وصل لمرحلة الثراء لي مستحيل كان يحققها هنا، كنعرف دراري كانت عندهم فراشة معايا في طنجة وحرگو ودارو لاباس واحد راه مقاول في المغرب وعندو شركة لإستيراد آلات البناء، وطبعا كاين بزاف خريين ماتوا وتشردوا وحماقوا ورجعوا لهنا مراض عقليا او مدمنين ديال الغبرة، ماشي كاع القصص نهايتها سعيدة ولكن احتمال تعيش حياة محترمة تما راه كثر من هنا، وهذا هو الموشكيل الحقيقي المغرب بلاد مخنوقة جامدة فيها قوانين قامعة للحريات، الشباب معندو مايدير فيها من غير يتپردى في الشارع، لا قراية لا خدمة لا موهبة ، الدراري كيوصلو حتى لافاك وهوما يالله محاربين الأمية مايمكنش تقول عليهم جامعيين، المبادرات لي تدارو لتشجيع الشباب سواء على الاستثمار او العمل اغلبهم فشلوا، راه خاص الدولة تحارب الرغبة في الهجرة السرية وتحارب الظروف لي تخلي أطفال وقاصرين يفكرو يقطعو البحر عومان باش يهربوا من البلاد، عوض تحاربهم وهوما كيحاولو يقلبوا على حياة أفضل.
