محمد سقراط-كود///
فاش كنكون شاد الناصيونال كنحس براسي بحال الى أنا الكولونيل عبابو وغادي شاد الطريق ندير إنقلاب بقوة الباراجات ديال الجوندارم والبوليس والرادارات، وشي باراجات حدا بعضياتهم أصلا، أو تلقى بوليسي في الدخلة دالمدينة هاز الرادار وفي نفس الوقت كاين رادار فيكس غير حداه، مثلا في الدخلة ديال اصيلة كاين رادار فيكس وكتفوتوا شوية كتلقى البوليس بالرادار، حقا الأمن مزيان يكون في الطرقان ومداخل المدن ولكن لي ماشي مزيان هو الفخاخ لي منصوبة للسائقين بمشاركة وزارة التجهيز لي مقصرة بزاف من ناحية التشوير الطرقي الغير منطقي، كتلقى بلاكة ديال تمانين حداها بخمسين ميترو ستين من بعد مية من بعدها ستين، أو مثلا كتلقى الدخلة ديال شي فيلاج ستين ولكن فاش كتفوتوا مكتلقى حتى بلاكة، الطريق كلها ونتا حاير باش تمشي وكي تدير تمشي بحال إلى أصلا مدوزتيش البيرمي، أنا نيت فاش كندوز من شي طريق مكنعرفهاش كنبقى نتسنى الطاكسي فكاك الوحايل كنتبعوا هو لي حافظ الرادارات والباراجات.
شحال من مرة كنكون باغي نتسارى مازربانش باغي نمشي بشوية عليا نوقف فين بغيت نفوج نتمنظر خصوصا في الربيع والخضورة، حتى كنلقى راسي مخلص بروصي ديال 150، داك النهار مشيت لباب بودير، مشيت لتازة عبر الطريق السيار ومن بعد طلعت لراس لما ولباب بودير وهبطت على بوشفاعة وقلت نكمل ناسيونال أنا أصلا غير مساري صدقت مخلص 150 درهم، أييه خلصتها حيت ماحتارمتش قانون السير، واحد الهبطة والطريق مسرحة وفيها بلاكة ستين وأنا حتى فتها بشوية عاد نقصت لقيت الباراج تحت لعقبة، خلصت البروصي ودرت رجعت بحالي للطريق السيار نمشي هاني ومناقص من شي مسارية، أصلا الطريق السيار ولات شبه اجبارية باش تمشي هاني من الباراجات وحتى هي راه كانوا معمرينها واحد الوقت، نتا غادي بمية وعشرين حتى كيخرج ليك جدارمي وسط الطريق حكا شد ليمن.
هادشي بلا منهضرو على التمييز حسب البلايك ديال الطوموبيل، كانت عندي ماتريكول ديال الحسيمة كنت تقريبا كنوقف في كل باراج في أي بلاصة في المغرب من غير بين الناظور والحسيمة، أما هنا في فاس ومحيطها كانوا كيوقفوني بشكل رسمي فقط حيت الحسيمة بحال الى أنا هو الزفزافي راه غير بلاكة هاديك، حاليا عندي البلاكة على فاس راه نقص التوقاف من أجل المراقبة مية في المية ماشي غير تسعين، على الأقل قبل منتحاسبو على واش الضوبلاج في الخط متاصل أو متقطع خاص يترسم بعدا، ماشي الخط ممسوح الطريق مدكدكة جنابها كلهم رايبين، مثلا الطريق بين سيدي قاسم وفاس و وازان وفاس مكرفصة في مقاطع كثيرة، وعلامات التشوير لا منطقية والباراجات محطوطين بحال شي مصيدة، حتى كتولي تكره علاش دزتي من الناسيونال.