سهام البارودي – كود//
البحر فحال العرس فحال الجَامع راه عندو القواعد ديالو فالعالم كامل ! الناس لي كايعرفو للبحر و عايشين مع البحر و جدودهم كانو كايمشيو للبحر لغرض الاستجمام، راه عارفين بلي الماتريال لي خاصهم فأي بحر فالعالم كامل هوا فوطة، و لومبر صولير و مايو د بان للرجال و العيالات ! و معروفين المعايير ديال المايوات فحال لي معروفين الحوايج ديال الاحرام فالحج فحالا معروفين الحوايج لي غاتلبس لابغيتي دوز اونتروتيان د للخدمة ! كلشي واضح و باين!
فالعالم كامل لامشيتي للبحر كاتلقا العيالات بالمايوهات و الناس كاتشمش و لا جالسة تحت باراصول و لا شادة شي كرسي و لا طرونزاط !
إلاَ عندنا حنا العام لي جا يلقانا مضاربين مع شي وحدين باغين يديرو الكياطن ديال المواسم فالبحر ! و شي وحدينات باغين يعومو بالبيجامات و شي تهيميج و شي تعربين و واحد البداوة ماكانتش فالمغرب فبداية الاستقلال ! ديك الساعة لي عندو المايو كايمشي يعوم و لي ماعندوش كايشد تيقارو فدارو ماكاينش هاد الفوضى لي كاينة دابا ! بنادم باغي يمارس الهمجية ديالو و الفوضى و يعطيها شرعية من الفوق ! مال الدرويش مايعومش ؟! مال الدرويش مايبنيش عشّة فالبحر و يحرمك من شوفة المواج؟ مال الدرويشة ماتعومش ببيجامة ؟!
الصراحة انا بعدا طلعو ليا هاد الدراوش الفوضاويين فكرّي ! ديما كايجيو من وراهم غا المشاكل ! ماقادينش يندامجو فحتى شي خصية بشكل عادي ! لا ضروري يخلقو ليك شي مشكل ! وا البحر يا عباد الله فالعالم كامل كايتشابه ! فالسينيغال لامشيتي تعوم فسالي و لا فالتايلاند و لا فاوروبا و لا فميريكان غاتعوم بنفس الطريقة وبنفس الماتيريال إلا عندنا حنا ! كاتمشي للبحر فحالا داخل لشي مخيم من مخيمات اللاجئين خاص غير الكاميونات ديال غوت اللاجئين يدخلو يفرقو الخناشي د الطحين !
معلوم مايكون البحر ديما هايج ! طلعات ليه هاد التاعروبيت فراسو ! ضربك موجة فأشقار تسيفطك تال مولاي بوسلهام..