سهام البارودي – كود//
العلاقة بين الوالدين و الابناء فالمغرب من اكثر العلاقات الغير الصحية فالعالم، حيت عوض انها تبنى على الحب و الاحترام كاتلقى العكس. الواليدين اصلا واليدين داك الطفل بلا حب غا حيت شافو وحدين اخرين ولدو حتى هوما ناضو ولدو و غالبا كايعتابرو داك الولد راه خاصو يرد ليهم الجميل لي دارو فيه ولدوه و كبروه واخا هوا راه واجب عليهم حيت هوما لي جابوه لهاد الدنيا الكحلة. و أصلا الاغلبية كايولد فظروف مقودة عليها لا هوا قاد بالاولاد لا هي قادة بالاولاد و كايكبرو ولادهم وسط العنف الجسدي و اللفظي و الله ينعل جد بوك الكلب و الله يحرق طاسيلتك …
العلاقة واخا كاتبان ظاهريا زوينة و لكن فالحقيقة كاتكون علاقة مرضية، غير سوية و فيها بزاف ديال المسكوت عنه و بزاف ديال الطابوهات، شحال من بنت فايتة ناقشات معاها أمها أمور الجنس بطريقة واضحة و سلسة ؟ قليل بزاف، شحال من أم غاتلقاها فايتة قدمات نصائح جنسية لولادها ؟ قليل جدا. شحال من أم غاتلقاها عارفة واش ولادها مثليين ؟! واش عندهم شي حبيب شي حبيبة ؟! لا طبعا ماكاينش هادشي حرام و عيب و حشومة و هادشي لي كايخلي العلاقة يكون فيها بزاف ديال المسكوت عنه ! و حتى الدراري كايفهمو بلي مايمكنش يعولو على واليديهم و يتقاسمو معاهم همومهم و مشاكلهم.
المشكل أنه هادشي كايخلي گاع الواليدين باغين يقنعو راسهم بزز بلي ولادهم ملائكة، كلشي والد الصحابة و الصحابيات، كلشي كايقوليك انا ولدي مايديرش انا بنتي ماديرش ! هوا تلقى ولدو قادر يذبح و يسلخ و لكن باه و مو كايخرجو عينيهم فيك و يقولو ليك ” محمد ولدي ؟! لا مايديرهاش” ! المشكل مجموع فيه الكذوب مع عدم الوضوح لي مسيطر على العلاقات بين الواليدين و الابناء لا الآباء عارفين و لا باغين يعرفو شكون هوما ولادهم و كايفضلو يحتافضو بواحد الصورة ملائكية على ابناء لي يمكن ابشع منهم ماكاين.
تفكرت هادشي وانا كانشوف الفيديو ديال واحد الأم كاتعاود على بنتها لي ماتت فشي حفلة و كاتقول بلي بنتها ماكاديرش الكوكايين. أولا ديك البنت الله يرحمها و ثانيا ممكن تكون ماكاتعاطى لحتى مخدر و لكن كاين احتمال انها تكون كاتتعاطى و الأم ماعارفاش. كاين احتمال ديال كلشي … حيت كلشي ممكن يدير كلشي.
الواليدين خاصهم يتقبلو انهم ماولدوش الملائكة
و انهم عندهم مسؤولية كبيرة فمصير الأبناء ديالهم ( ماشي مسؤولية كاملة طبعا و لكن كاينة مسؤولية)
و يرضاو بلي الدراري استثمار حتى واحد ماكايعرف شنو غايخرج فيه
أما مسألة ولدي مايديرش بنتي ماديرش ! كلشي يقدر يدير كلشي آ الحاجة.