محمد سقراط-كود///
في الوقت لي الحموشي كيبدل مجهود كبير لتحديث مديرية الأمن الوطني في المغرب كامل، وفي الوقت لي عرفات مدينة فاس تنظيم الأبواب المفتوحة للأمن الوطني وشفنا التقنيات والإمكانيات لي وصل ليها هاد الجهاز، إنفتاح هاد الجهاز وتحديثه راه ماغاديش بنفس المستوى بين لفوق ولتحت، في الوقت لي أجهزة الأمن العالمي كتدير شراكات مع البوليس المغربي وكتحتاجو فيب قضايا مصيرية، راه في مدينة فاس نيت باقا ملحقة الوفاق ديال عين السمن خدامة بحال التمانينات، ليوم مشيت نطلب شهادة السكنى باش نجدد البطاقة الوطنية، مشيت مع التسعود وربع ديال الصباح ومستاعد نفسيا أنني نشد النوبة ساعة أو جوج، ولكن كنتفاجئ فاش سولت واحد البوليس كان تم بلي خاصني نجي مع السبعة أو السبعة وربع ونتقيد فواحد اللائحة لي محدودة العدد ونرجع من بعد، هادشي مكاين حتى فشي بلاصة أنك تجي مع بونبر وتقيد فلائحة باش تخرج وثيقة إدارة، خاص نجي في الوقت لي كتبدى الإدارة الخدمة ونشد الصف مع الناس، علاشى غادي نجي قبل الموظف بساعتين.
السجل العدلي كنخرجو غير من الأنترنيت ويوصلك في إيمايل ماتمشي ماتجي ماتسول سيكوريتي في الباب ماتواصل مع حتى شي موظف، كذلك عقد الإزدياد كيوصلك في برية حتى لباب الدار متحتاج بحال شحال هادي تسافر على ودو يوماين ديال الطريق، ولكن شهادة السكنى ديال البوليس خاصني نفيق ليها مع السبعة واش هادشي بعدا قانون دايراه إدارة الأمن الوطني أو غير إجتهاد ديال ملحقة الوفاق بعين السمن من أجل تنظيم إستخلاص الوثائق، إلى كان غير إجتهاد فراه فيه تكرفيص كثير للمواطن لي خاصو يجي مع السبعة لموت ديال البرد باش يتقيد في لائحة ويرجع منبعد يحط الوراق ويعاود يرجع ياخد الشهادة، وطبعا مكتصدقش عاد العملية شحال من واحد غادي يجي ويقولوليه سير حتى لغدا، هاد المنطق لي المغرب بدل مجهود كبير باش يتجاوزو باقي كيتمارس في ملحقة عين السمن.
راه خاص تكون سلاسة في إستخلاص الأوراق الإدارية، الأمن الوطني في عهد الحموشي عرفوا تطور كبير، وأصبح الولوج لأي إدارة دالأمن الوطني جد سهل وبلاى تعقيدات وإستخلاص الأوراق أو تقضي أي غاراض في ظروف إنسانية، ولاية أمن فاس نيت راه كتمشي في الوقت لي بغيتي وتشد الصف مع الناس وتفضي غاراضك وفي الغالب ماتفوتش نص ساعة، إلا هاد الملحقة فيها هاد العجب منعرف شناهو لائحة خاص تقيد فيها مع السبعة أو السبعة ونص ديال الصباح باش تخرج شهاد السكنى وقوة سير آجي ، بينما أغلب الوثائق في المغرب حاليا تقدر تخرجهم من الأنترنيت.