سهام البارودي- كود//
موازين ماكاملاش شهر باش سالا، ماكاملاش شهر لامشيتي ليباج ديال اللحايا غاتلقاهم كايحطو شي منشورات باش يقولو فيها بلي المغاربة أفشلوا مهرجان موازين، هاد الفشل طبعا لي شافوه غير هوما بوحدهم حيت الفيديوات ديال الداودية و نيكي ميناج و محمد رمضان و هيفاء وهبي و بزاف ديال الفنانة لي مازالة لدابا فيوتوب و صفحة گود كايبينو ليك العكس، المغاربة ناشطين، شاطحين، مفوجين، ملوزين، مغنيين مع راساتهم. بلا مانهضرو على المهرجانات الاخرين فحال مهرجان الصويرة.
هادشي فزمن اليوتوب و الفايسبوك و الفيديوات لي موثقة كلشي حتى عدد الحضور يمكن ليك تحسبو بالدرون، و هاكاك و اللحايا عندهم السوفل ياش يكذبو و يتيقوها و يحاولو ما امكن يروجو للكذبة ديالهم و يزورو الحقيقة لي كلشي شافها بعينيه.
فمابالوكاااا يا أخي و يا أختي بالسلوگليات لي كانو كايطلقو علينا جدودهم فاش ماكان لا يوتوب لا فيديو لا ضرون لا والو، غي هادي بوحدها تعطيك العربون، تعطيك الدليل على انه جدودهم غايكونو زورو التاريخ و الحقائق و قنعوا الناس بالأوهام و خصوصا داكشي ديال قال فلان عن فلان عن ابي فلان الفلاني… هوما غا بين يونيو و يوليوز اخترعوا كذبة و تيقوها شوف شحال ديال الكذوب غايكونو ختارعوا فهاد القرون كاملة لي فاتت ؟
كيفاش لحية ماقادرش يكون محايد و يقول الحق فزمن اليوتوب غاتسنى من جدّو انه يكون قال الحق واحد الوقت فواحد الزمان؟ هادشي طبعا مستحيل.
داكشي علاش الانسان خاصو يرد البال و يخدم عقلو لي عطاه ليه الله سبحانه لا اله الا هو باش يميّز الحقيقة من السلوگيات.
