كود هناء ابو علي كازا///
خاص كل واحد يتحمل مسؤوليتو. خاص الدولة دير تحقيق فقتل الرجاوية نورا بمركب محمد الخامس السبت اللي فات فماتش الراجا ضد الاهلي٬ ماشي كيف السابق. القضاء خاصو يعلن على نتائج التحقيق كاملة ويترتب عليها. اللي يتعاقب خاصو يتعاقب.
لكن قبل ما يتعلن علي النتائج كاينة بديهيات. باراكا علينا وحنا مرشحين لتنظيم مونديال 2030 من ديك التخريجات ديال والو.
شكون المسؤول الاول فكازا؟ هو والي جهة الدار البيضاء سعيد احميدوش. هاد الوالي عوض ما يتحرك فهاد الاحداث لكبيرة ويخرج ويمشي لكازا٬ عوض ما يشوف التقارير اللي كتحط عندو فوق مكتبو على وعيد فصائل هاد النادي او داك ويتعامل معاها بصاح٬ سيدنا الوالي ناعس فمكتبو. ما كيدير والو.
القوات العمومية تابعة ليه اداريا. الشركة المكلفة بمركب محمد الخامس تحت امرتو. هو ممثل الدولة. امن كل كازاوي بيدو هو. الثاني المسؤول هو عزيز دادس عامل انفا اللي كيوقع فيها التيران. السي دادس كادگ يمنع حلفة بوبا. دارگ يمنع تنقل جمهور الجيش لماتش غدا ضد الوداد. حادگ يمنع دخول الجمهور لماتش الطاس ضد مكناس اليوم الثلاث وما قدر يدير والو باش ما تقتلش نورا.
نورا تقتلات والمسؤولية مسؤوليات. الدولة ممثلة فالوالي والعامل عندهم مسؤولية.
كيفاش ماتش بهاد الاهمية ومعروف باللي غادي يجيه جمهور كثير وما دارش ليه حواجز بعيدة بزاف بزاف على الملعب. كيفاش ماتش بهاد الاهمية وما كايناش وحدة صحية كاملة فالتيران. وحدة تقدر تقدم الاسعافات ماشي غير الاولوية٬ وتنقد حياة مغاربة
دابا الوالي ومعاه عامل انفا خرجو خبار ومن دابا عينو الحولي اللي غاديين يضحيو بيه. هو محمد لجواهري مدير “كازا ايفنت”. قاليك مسؤول على تدبير الملعب. كل واحد كيمشي للتيران كيعرف باللي ماشي بصاح. الوالي هو المسؤول الاول. العامل هو المسؤول الثاني. وباراكا ما ضحكو علينا. كيفاش هادو هما اللي غاديين يترأسو اجتماع باش يدينو لجواهري ويستابقو حتى القضاء.
هادي فضيحة كبيرة اهانة للقضاء