كود هناء ابو علي ///
المثير فلائحة المسؤولين اللي كيحضرو جلسات العمل اللي دارت فالقصر الملكي وللي لحد الان وصلات ثلاث جلسات واللي كيرأسها رئيس الدولة هو غياب الاستقلالي نزار البركة بصفتو وزير لقطاع غاية فالاهمية للي هو التجهيز والماء.
فهاد الجلسات للي ترأسها الملك كيف قلنا حضرها فالاضافة الى رئيس الحكومة عزيز اخنوش ومستشار الملك فؤاد عالي الهمة كل من ووزير الداخلية عبد الوافي لفتيت، ووزير الأوقاف والشؤون الإسلامية أحمد التوفيق، ووزيرة الاقتصاد والمالية نادية فتاح، ووزيرة إعداد التراب الوطني والتعمير والإسكان وسياسة المدينة فاطمة الزهراء المنصوري، والوزير المنتدب لدى وزيرة الاقتصاد والمالية المكلف بالميزانية فوزي لقجع، والفريق أول محمد بريظ المفتش العام للقوات المسلحة الملكية وقائد المنطقة الجنوبية”.
وزارة التجهيز دارت خدمة مزيانة وقدرات فوقت قياسي تفتح كاع الطرقان اللي كان ضربها الزلزال وعملها كبير بزاف.
حضور نزار البركة عندو معنى اكثر من حضور وزيرة بحال فاطمة الزهرا المنصوري وزيرة اعداد التراب الوطني والتعمير والاسكان وسياسة المدينة. علاش؟ لان الزلزال ضرب القرى وهادو تابعين فوزارة الداخلية ماشي للاسكان.