سهام البارودي- كود//
شي ناس ماكايتفهموش ليا كيفاش كايفكرو ! من نيتو كايتحسر على المغرب ديال السبعينات و الثمانينات و كايقوليك “الزمن الجميل ” و منين جا لبوه شي جمال آ حنيني ؟
ياك كان غا القمع و الزلط و الأمية و الجهل، الاغلبية د المغاربة ماقاريينش و غارقين وسط الخرافة و الجهل كايتجاراو باش يديو المرفودة لمولاي بوعزَة و يتفرجو فشي عيساوي كايشرب الما طايب من المقراج ! ايه المغاربة ديال 2023 ماشي كلهم قاريين و حتى لي قاري فيهم كاين لي مازال حتى هوا غارق وسط الجهل و لكن ماشي فحال السبعينات و الثمانينات ! مايمكنش نقارنو ديك الوقت بهاد الوقت !
-كان الزلط و الجوع و الاغلبية الساحقة ماكايشبعوش فكرشهم، و لي قرا الخبز الحافي ديال محمد شكري غايكون شاف كيفاش الناس كانو كاياكلو من الطوارو د الزبل واحد الوقت فالمغرب ! الناس دوزو الجوع د بصح و مازال الاثر ديالو على النفوس ديالهم و ديال ولادهم لدابا ! اما دابا الحمد لله مع اليوتوب و تيكطوك و المخطط الاخضر كلشي واكل البيتزا كلشي شارب العصير دلاڤوكا ! تدخل لأي براكة فالفطور فرمضان غاتلقى السردين و البريوات و الحريرة و الحليب واتاي شحال هادي كان بنادم قاهرو غا الخبز واتاي ! اللحم كايشوفو غا من العيد للعيد ! دابا الحمد لله بانيني ديال لاداند يفاريها بروتينات!
-كان القمع، غي بوليسي ديال الطريق يقدر يمرمدك و لا حليتي فمك يلصق ليك شي اهانة موظف و يغبّرك و شحال من واحد غبر و لدابا مالقاوش ليه الاثر ! دابا لا كاين الحقوق و الانسان يقدر يهضر و يدافع على راسو ! و الڤيديوات فاليوتوب عامرين بالمواطينين لي كايوجهو نداءات مباشرة لسيدنا و للحموشي باش يتدخلو يحلو ليهم مشاكلهم !
-كانو المغاربة كايلبسو الدرابل الحوايج ماشي فمتناول الجميع ، دابا الحمد لله الشينوا وفرو ليك نايك كوبرا بعشرالاف ريال فدرب غلف ! الجواكط و المونطويات و السبرديلات كلشي موجود فالجوطيات و الحوانت ابتداءا من درهم !
– كان بنادم قاهرو غا الوسخ و الگمل ، الديور مافيهمش الدوشات و لابغيتي تغسل خاصك تمشي للحمام هادشي فالمدن الكبرى اما البوادي الگملة كاتلقاها گد الطوبة فموسطاش الراجل
-المغاربة لي عايشين دابا راهم محظوظين بزاف اكثر من جدودهم و جدود جدودهم ! عايشين فوقت الاطباء و العلم و الانترنيت و نيتفليكس و التجارة الاليكترونية و تيك طوك ! الماكلة موجودة، الكرارس د الديسير عامرين، بنادم كايصور ڤلوگ من براكة و فاطر بجوج بيضات و الفرماج و الزيت البلدية بينما شحال هادي البيض راه كان وجبة كاتجتامع عليها العائلة !
-الانسان يمكن يتحاور مع واليديه و المعلم ماعندوش الحق يضرب التلميذ ! في حين شحال هادي كانو شي معلمين كايعلقو التلاميذ و يسلخوهم و يعلقو ليهم بلاكة فيها “انا حمار” و يساريوهم على الاقسام ! و فاش يشكي على باه ينوض يجندخو حتى هوا !
تا راه المغاربة دوزو الحرب و القتال فديك السبعينات و الثمانينات هادشي علاش مايمكنش انسان سوي نفسيا يتحسر على ديك السنين السوداء لي نتجات لينا اجيال مريضة معاقة، خرجات على المغرب و يا الله يا الله بدا يتعافى منها بفضل الاجيال الجديدة.