سهام البارودي – كود//
اخطر و اقود جملة عندنا هي ديك الجملة الهلامية ديال “مافيها باس” و خصوصا فاش هاداك لي كايقولها كايدير داك وجه الكلب لي صابّة عليه الشتا باش يقولها ليك ! وغالبا كاتقال ليك الى شي واحد اصدر شي تصرف لا قانوني و لا اخلاقي و تشكّيتي منو ، كايجي شي ولد الناس و لا بنت الناس باغي يدير فيها خيط بيض زعما باش يقوليك ” ايوا مافيها باس” ! مافيها باس يضربك راجلك هاداك ! مافيها باس الى دفعك الطوبيس هذا ! مافيها باس الى حط كروصتو د البنان حدا الشرجم ددارك و احتل الشارع العام راه ماعندو فين يمشي واش بغيتيه يگريسي؟! مافيها باس الى نتفاتك ماماك هاديك ! ديما المغاربة كايلصقو هاد الجملة ديال مافيها باس لشي مصيبة كحلة باش يبررّوها !
شوف آ سّي ! ماكايناش شي حاجة سميتها مافيها باس ! كاين قانوني غير قانوني ! و فالقضية ددوك الاساتذة الجامعيين لي هبطهم البيلوط من الطيارة راه مادارو فيها مايصلاح و مزيان لي هبطهم و عيط ليهم على البوليس ! الطيارة فيها البلايص بالنوامر و لي عندو شي نمرة كايجلس فيها صافي سدّينا ! تكون استاذ جامعي ! بوليسي ! بطل اولامبي و لا خضّار كاتحط ترمتك فالبلاصة لي عندك فالبييي ديالك و فاش كايكونو جوج و لا ثلاتة د الناس باغيين يجلسو حدا بعضياتهم كايشريو نوامر قراب ! البلايص فالطيارة راه بالفلوس و هادشي راه معروف ! ماعرفتش علاش باغين ينوضو ضجة على البيلوط لي طبَق القانون مع ناس خلقو ليه البلبلة فالطيارة ! صافي مابغيتيش تستجب للقانون غايجي البوليس يهبطك و سدّينا !
لا لاواه استاذة جامعيين لاواه عميد كلية لاواه مافيها باس الطيارة خاوية! راه هاد الهضرة لي خاوية ! اساتذة جامعيين راه مصيبة كبيرة انهم مايحتارموش القانون و يبغيو يكونو فوق القانون ! راه المشكل فالاساتذة ماشي فالبيلوط ! ايوا شنو دابا غايجي شي واحد فيه الجوع يشفر دجاجة من شي مشواة و نبقاو نبررو ليه مافيها باس مسكين فيه الجوع ! مافيها باس اصلا ديك المشواة كانت غاتسد و الدجاجة غاضيع ! مافيها باس اصلا ديك الدجاجة ديال البارح مكننزة شكون غاياكلها ؟! واااااااا سّي محمد ماكايناش شي حاجة سميتها مافيها باس و لا حليتي هاد الباب ديال مافيها باس راه غي نسدو المحاكم و البوليس و نحيدو القانون و نجلسو ! كي داير هاد العالم لي غايمشي بجملة فحال “مافيها باس” ؟!
جاتني انا گاع لي عندو شي حساب قديم مع لارام بغا يتزايد عليها بهاد القضية د الاساتذة و يجمع الجوقة و شاهد و حصري واك واك واك عتقو الروح و داك التبوحيط د الحمّامّات ! لا والو نحن لا ندوخ القانون هوا القانون و لي كايخالف القانون كايتربّى ! و شحال من واحد محتاج يتعاود فالتربية.