محمد سقراط-گود///
عدد ضحايا الصراع الفلسطيني الإسرائيلي ماشي شي رقم كبير منذ بداية الصراح وحسب المركز الفلسطيني للإحصاء راه من بداية الصراع لحد الآن واصل العدد لشي مية ألف. وشي مليون تجرى عليهم تمنمية الف في العالم وميتين الف في الأردن لوحدها، هاد الاعداد ماشي كبيرة مقارنة بالاحداث الأخرى لي وقعات في العالم راه غير الحرب الأهلية السورية عدد الضحايا وللاجئين في سنوات قليلة مضوبل على عدد الفلسطنيين من نهار بدا الصراع في بدابة القرن الماضي، تمانين عام وإسرائيل كتقتل في الفلسطنيين ويالله وصلات مية ألف هذا كيعني أن آلة القتل الإسرائيلية فاشلة وماشي بداك الفعالية كيما كنتخايلوها وأن العرب والمسلمين غير بيناتهم كيديرو كثر من هادشي، إسرائيل كان خاصها تزيد السوايع وتتعلم من صدام حسين محبوب العرب والمسلمين لي ضرب بالكيماوي منطقة تابعها لبلادو وأباد شعبها كالحشرات، وكذلك بشار الأسد وباه وداعش والنصرة والعديد من القتلة العرب والمسلمين لي كيتفوقوا على إسرائيل بمية مرة.
على مايبدو فإن إسرائيل رحيمة بالفلسطنيين أكثر من رحمة صدام حسين او بشار الأسد بشعبهم واكثر رحمة من السنة والشيعة والدواعش والمتطرفين المسلمين في بعضياتهم. والمغاربة والمسلمين والعرب معندهمش موشكيل مع أي مجزرة ترتكب في حق خوتهم غير مايكونوش يهود لي رتاكبوها والجزيرة أي غطاتها، عمر المغاربة او المسلمين عموما ماخرجوا في مظاهرة للتنديد بجرائم داعش أو جرائم القاعدة، في الوقت لي كانوا المظاهرات في التسعينات دعما لصدام حسين المجرم القاتل، راه كانوا المسلمين كيقتلوا في بعضياتهم في الجزائر في العشرية السوداء راه ميتين الف دالقتلى تقريبا ومع ذلك عمر شي حد ندد او دعم او خرج للشارع وقال اللهم ام هذا منكر.
كاينة مجزرة قاعدة سبايكر لي رتاكباتها داعش في العراق في حق ألف وسبعمية شاب طالب عسكري في نهار واحد بقاو يقتلو فيهم ويلوحو في الواد حتى رجع كامل دم وهادشي موثق ومصور ومحطوط في الانترنيت بكل تفاخر، ومع ذلك مكتسمعش حتى إدانة لأفعال داعش، علما ان اغلب ضحاياها كانوا مسلمين، مجزرة حي التضامن السورية دخلو لحومة جمعوا الرجال لي فيها وكيقولوا ليهم سيرو راكم احرار كيزيدو شوية كيقتلوهم ويلوحو في حفرة، مجازر كثار لا تعد ولا تحصى في حق المسلمين عبر بقاع العالم وحتى حد مكيتضامن معاهم، بينما يموت فلسطيني واحد كتقلب الدنيا، راه حداهم في سوريا ميتين الف طفل ماتوا وتشردوا وهانية عند الناس، واش الفلسطنيين لي دمهم ازرق وقدروا يسوقوا راسهم تاريخيا بأن قتلاهم متميزين على قتلى باقي المسلمين؟ أو المسلمين لي عندهم مشكل عقاىدي مع اليهود وكيفضلوا يموتوا بالالف على يد جنود الميريكان والمتطرفين والقادة الديكتاتوريين ومايموتوش على يد ليهودي لي غادي تولي الشجرة والحجرة تنعت للمسلم عليه باش يقتلوا حسب الكاسيط الديني .