محمد سقراط-كود///
كاين العديد من التحف السينمائية الكورية لي تناولات أيام الحكم العسكري والإنقلابات العسكرية عندهم، ويكفي أنك تفرج فيلم The Man Standing Next لي خرج في 2020 وكيهدر على حادثة إغتيال الدكتاتور العسكري “بارك شونغ هي” باني كوريا الحديثة، ومن بعد تبعوا بالتحفة السينمائية لي خرجات هاد العام 12.12: The Day ولي كيهدر على الأحداث لي تبعات هاد الإغتيال وكيفاش ستولى الديكتاتور ” تشون دو هوان” على الحكم وماعرفه هاد الإنقلاب من أحداث دموية عطلات المسار الديمقراطي في كوريا، وهاد الجنرال لي تسبب في مجزرة غوانغجو لي ماتوا فيها أكثر من ستمية مدني ولي غادي يتم تخليدها سينمائيا في جوج من التحف الكورية الفيلم الأول كيهدر بالتفصيل على الأحداث وسميتو May 18 خرج في 2007، ولي كيحكي ويفسر حراك مدينة غوانغجو ضد الديكتاتورية والظلم والحكرة ولي بداوه الطلبة ومن بعد نظموا ليهم المواطنين وهجموا على مخازن السلاح وتسلحوا، وجا ليهم العسكر ذبح منهم الكثير، وهاد الأحداث لي غادي تسبب في عزل الديكتاتور فيها بعد الحكم عليه بالإعدام ولكن غادي يتعفى عليه من طرف رئيس مناضل منخب ديمقراطي، وكاين أفلام أخرى كثيرة كتناول هاد الحقبة وكلها أفلام واعرة ومن خلالها يمكن لأي واحد يكون فكرة على الحياة السياسية والإجتماعية في كوريا إبان الدكتاتورية العسكرية وكيفاش وقعوا الإنقلابات فيها وشكون مورط، طبعا مع إظافات درامية رته سينما هادي ماشي وثائقيات وداكشي مخدوم، أنا نيت دابا كنعرف على ديك الفترة في كوريا كثر ملي كنعرف على نفس الفترة في المغرب.
في المغرب مكانتش عندنا ديكتاتورية عسكرية ولكن كانوا عندنا محاولات إنقلاب وحراكات وثورات مجهضة، وشخوص وأبطال تستحق تدار عليها أفلام مغربية، بحال إنتفاضة مولاي بوعزة وإنتفاضة الريف ديال تمنية وخمسين، وإنقلاب السخيرات واش مايستاهلش أنه يتدار عليه فيلم فيلق عسكري شاد الطريق ناصيونال من هرمومو حتى للصخيرات وتكون مشاهد مصورة بالدرون ديال شاحنات التلاميذ ديال مدرسة هرمومو هابطين مع العقبة دسيدي عبد الرزاق ولحظة وصولهم للحفل لي كان داير الحسن التاني والقرطاس والفوضى والدم لي سال، أو شيخ العرب والمطاردة الشهيرة لإلقاء القبض عليه، وهادشي يا حسرة موثق حتى أدبيا سواء من شهادات المتهمين في هاد الإنقلابات والإنتفاضات أو من خلال أعمال أدبية لي كترسم حقبة طويلة بحال ميترو وموحال ليوسف فاضل أو ثورة الأيام الأربعة لعبد الكريم الجويطي، وبزاف ديال الأحداث لي ممكن يتدارو منها أفلام ملحمية وتقدر تعرف المغاربة بماضيهم القريب ماشي حتى البعيد هادشي راه غير واليدينا حضرو ليه وحنا ماعارفين عليه والو.
المغاربة أمة عظيمة عندها تاريخ كبير وأحداث كثيرة تستاحق تدار منها أفلام ومسلسلات، إنقلاب الصخيرات كمثال يستاهل يتدار منو فيلم ونعرفو واش الإنقلابيين دازو على بير طم طم وشد الطريق للصخيرات أو دازو على المنزل صفرو عاد هبطو لفاس، وأحداث بحال هادي الى تصورات وتأرخات في السينما غادي نتصالحو معاها كمغاربة، عوض تبقى دابا داخلة في المسكوت عنه نوعا ما، مطاردة شيخ العرب في أزقة وأحياء الدار البيضاء من طرف الجنرال الدليمي، هاد المطاردة راه كان فيها القرطاس والمقاومة وماتوا فيها البوليس راه فيلم ديال الأكشن حقيقي مايحتاجش البهارات السينمائية يكفي تحط الوقائع كيما هي وراه شبعانة تشويق، هذا تاريخنا خاص نتصالحو معاه ومايبقاش المغرب كيتعامل معاه بشبه نكران ، الإنصاف والمصالحة راه كانت خطوة في بداية الطريق وماشي نهايتها، زعمة الجرح راه برى آجي عاود شنو وقع ليك هاك فلوسك سير الله يعاونك ماباقيش تجبد هادشي، لا هادشي خاص يتجبد ويتصور راه مادة حقيقية لصنع نحف سينمائية، بحال كاع العالم كيصاوب أفلام على تاريخو، ألمانيا النازية والمحرقة ومنعرف شنو وكتدير أفلام على ديك الحقبة مابقى غير حنا.