كود هناء ابو علي ///
جوجت المشاهد واقعة دابا. المشهد الاول استجواب رئيس الحكومة الصبليوني لثلاث 19 ابريل 2023 من قبل كاع الاحزاب. كان الموضوع سياسة الحكومة فقطاع السكن والاتحاد الاوربي والمغرب. فالموضوع الاخير وكيف كتبنا قبل يومين٬ كان اجماع قادة الاحزاب عند الجارة الشمالية باللي خطأ سياسي كبير دارتو حكومة سانشيث باش اعترفات باللي ما كاين غير الحكم الذاتي لايجاد حل لقضية الصحرا. كان ما يشبه الاجماع علي مهاجمة المغرب. قبل هاد الشي وليلة الاحد فبرنامج “ايلينفورمي” على “السادسة” كانت يولاندا دياث نائبة رئيس الحكومة ووزيرة الشغل والاقتصاد الاجتماعي ضيفة. حوار هادئ. اجوبتو مفكر فيها بمدة. الوزيرة قالت باللي المغرب ديكتاتورية. وعدات باش تتراجع على دعم حكومة حليفها الاشتراكي فقضية الصحرا.
المغرب حاضر بقوة الان فالحياة السياسية الاسبانية. طبعا قبل شهر وسيمانا على الانتخابات الجهوية والبلدية٬ هاد الحضور غادي يتزاد. اليمين المتطرف كيبكي كيفاش المغرب كيتحكم فالسياسة الخارجية للصبليون. كيفاش يعطي للديبلوماسية الصبليونية الاوامر باش حيدات لايا كونزاليس وزيرة الخارجية السابقة من منصبها. شارو لرسالة كان بعثها المغرب.
المشهد الثاني هنا فالمغرب. هاد الموضوع سولناه للناطق الرسمي باسم الحكومة مصطفى بايتاس. سولناه واش الحكومة هدرات على هاد الشي فالمجلس الحكومي. الجواب كيف ديما. تهرب. ما ردش. ما تسوقش للسؤال. تصورو موضوع كبير بحال هادا يكون رد ناطق رسمي بالتجاهل.
الرد الوحيد على ما اثير جا من السفارة المغربية فمدريد. قالت باللي المغرب ما كيدخلش فالقضايا الداخلية لاسبانيا. جواب حتى لمغاربة ما قنعهمش. جواب ضعيف وبطريقة اضعف واغبى. بيان.
كيفاش احزابنا السياسية اللي فالمعارضة اكثر٬ خايفة تجبد هاد الموضوع. ما تگولوش لي اه حگا السياسة الخارجية كيشرف عليها سيدنا وماشي من حقنا نسولو. راه جواب تافه ويرجعكم يا الاحزاب تافهة.
خاص المعارضة تتحرك. تستجوب وزير الخارجية بوريطة اللي كيضرب الطم باش بلادنا كتسب وكيتبورد باش يكون شي كادو وجدوه ليه اللي كيخدمو الديبلوماسية بصاح.
خاص يكون رد على اللي كيتعرض ليه المغرب فاسبانيا. يتعلمو من الصبليون. تصريح ما كاين حتى فيديو عليه ديال النعم ميارة فلقاء حزبي لنساء الاستقلال وجبد سبتة ومليلية وقال اللي كيقولوه كاع لمغاربة٬ نوض البلبلة فالصبليون. جابو وزيرهم واستجوبو رئيس حكومتهم. ما كاين حتى فيديو وهو براسو كان نفى هاد التصريح ف”كود”.
اذن كاين جوايج ما راكبينش. خاص المغرب يتحرك. خاص الاحزاب السياسية دير المراقبة لعمل الجهاز التنفيذي. تسولو وتجيبو لمجلس النواب وحتى المستشارين. راه كنضعفو ريوسنا باش نقبلو بالمعيور ونسكتو.