اسماء غربي- كود//
نايضة هاد الويكاند على قضية الجلابة اللي تبين انها محظورة فمدرسة ديكارت الثانوية فالرباط.
وتداولو المغاربة الفرونسيزون فمواقع التواصل خبر منع تلميذ ف “ديكارت” من دخول الليسي بالجلابة، وحسب الخبار اللي راج المسؤولين د الليسي قالو ان الجلابة لباس غير مدني، او بعبارة أخرى ثوب ديني.
و تسألو المغاربة واش كاين قانون كيحظر هاد اللباس، وواش هادشي مكتوب بوضوح فالنظام الداخلي ديال المدرسة، وواش الدفاع على العلمانية والنور هو اللي بصح وراء هاد القرار..
مغاربة اخرين جاهم القرار عادي جدا، ومن حق الليسي يمنع تلميذ يجي بالجلابة، وقالو: دابا واش المغاربة كيلبسو الجلابة فالخدمة؟ فالبنكة والادارات؟ وواش الجلابة بلاصتها فالمدرسة والقسم؟ اه هي لباس مغربي عندو علاقة بهويتنا كمغاربة ولكن مكتعنيش انه صالح لكل مكان وزمان، حنا ف2023 كاين لباس نوعا ما موحد بين الدراري والدريات اللي متفق عليه يجيو بيه للمدرسة..
اخرين شبهو القضية بقضايا وقعو فمدارس مغربية واللي منعات حتى هي اللباس وقالت انه مجايش مع نظامها الداخلي، عقلتو على المدرسة اللي ماخلاتش بنت ملبسينها واليديها النقاب تدخل بيه للقسم..
وشخص كتب: واش الجلابة لباس ديني، لا ! هو لباس مغربي، ولكن واش عملي؟ طبعا لا! وماشي نورمال دري يمشي يقرا بالجلابة.
مع هادشي اللي واقع بين الرباط وباريس، واش اي قرار تخاد غادي نردوه ڤيكتميزاسيون وكره ديال الفرانسيس لكل ماهو مغربي ؟ واخا حنا عارفين انه فجميع الدول ومنها المغرب، المدارس عندها نظام داخلي كتمنع وتسمح فيه بلباس او غيرو، وعلما انه فعلا فمدرسة تابعة للبعثة الفرنسية راهم غايطبقو العلمانية وبالتالي غايمنعو اي حاجة دينية او حتى تقليدية وغريبة..