كود الرباط//
ضربة كبيرة تلقات المعارضة فالبرلمان، مور اعتقال محمد مبدع رئيس لجنة العدل والتشريع وحقوق الانسان، الوزير السابق والقيادي فالحركة الشعبية.
سياسيا، المعارضة فقدات “مصداقيتها” فاش دافعات يكون مبدع رئيس لجنة العدل والتشريع واخا هو متابع فملف خانز ديال اختلاس أموال عمومية أثناء رئاسته لجماعة الفقيه بنصالح.
الغريب هو أن الحركة الشعبية اقترحت أسماء عليها شبهات كثيرة باش يكونو فرئاسة هاد اللجنة، منهم متابعين فجرائم الأموال بحال البرلماني محمد عيدودي، وكاين كذلك ابراهيم اوعبا اللي خدا الكلمة لبارح باسم فريق الحزب خلال تدخلات الفرق النيابية لمناقشة مشاريع القوانين التي قدمها وزير الصحة والحماية الاجتماعية بمجلس النواب.
ابراهيم أعبا، اللي كيدافع على لوبي الصيادلة، هو اللي غايكون أحد الوجوه البارزة لي بغات الحركة الشعبية دفع به لمنصب رئيس لجنة العدل والتشريع، حيث معندوش حاليا حتى شي متابعة قضائية.
البروفيلات لي عند الحركة عندهم متابعات قضائيا، وتقارير رسمية (برلمان، المجلس الأعلى للحسابات وغيرها..).
دبا البرلمان غايعاود انتخب رئيس لجنة العدل والتشريع فجلسة عمومية، وذلك بعدما تقدم الحركة مرشح ديالها لهاد المنصب.
يشار بلي مبدع كولشي صوت عليه أغلبية ومعارضة ومنهم طبعا البي جي دي للي ديما كيناديو بتخليق العمل السياسي ومحاربة الفساد.