كود الرباط//
نفترض ان المحامين ربحو الدولة فمعركة الضرائب، وفرضو مطالبهم وتلغات ضريبة الاقتطاع من المنبع، شنو غايطرا؟ واش زعما يلا مخلصوش الدولة غاتوقف البرامج الاجتماعية؟ طبعا لا، والجواب كان على لسان وزيري المالية والميزانية، لي قالو بلي هاد الضريبة من المنبع مداروهاش باش يمولو البرامج الاجتماعية.
اييه الدولة يلا بغات تمول الحماية الاجتماعية غاتمشي لخط السيولة وتاخد كريدي، حيث تمويل كبير كيحتاجو هاد البرامج.
دبا اجيو تشوفو شنو ربحو المحامين وشنو خسرو؟. الربح باين وحدة تنظيمية ونقابية قوية، اييه تا حد مقدرش يدير بحالكم فالاحتجاج، وقفتو مصالح كبيرة مصالح شركات ومواطنين وإدارات ومؤسسات عمومية، وقفتو مداخيل صناديق المحاكم.
ولكن عرفتو شنو خسرتو؟. القيم، صورتكم أمام الرأي العام، المبادئ ديال الوفاء للاتفاق لي درتو مع الحكومة.
لي خسرتو كثر، هو أن المجتمع والرأي العام كيشوفكم بصورة خايبا، كيقول مبغيتوش تخلصو الضريبة وكتهربو منها.
إلى جينا نشوفو مزيان، الحكومة ما بيها لا اقتطاع من المنبع 20% ولا 15% ولا 10% ولا قل ولا كثر لجميع المهن الحرة، لي كيهمها هو المبدأ ديال الاقتطاع من المنبع. وما بيها لا المحامين يخلصو 400 درهم عن كل ملف ولا 500 ولا 600 ولا 100 ولا حتى قل من 100، المهم هو يخلصو أي مبلغ مهما كان على كل ملف ويخليو لا طراس.
آجيو نحسبوها مزيااان: الحكومة ما وقفاش على التسبيقات والدفعات ديال الضرائب لا ديال المحامين ولا الموثقين ولا الأطباء ولا أطباء الأسنان ولا المهندسين ولا الصيادلة … ثلاث أرباع الضريبة على الدخل كتجي من الموظفين وأجراء القطاع الخاص، بينما المهنيين كلهم، بمن فيهم هاد المهن الحرة وغيرهم، يالله كيوصلو لـ 5% من مجموع الضريبة على الدخل، أما إلى خدينا غير المهن الحرة فالرقم أقل بكثير… فلوس الضريبة على الدخل الدولة واقفة على الموظفين والأجراء لي مساكن كياكلو الشحط.
ثانيا هاد الاقتطاع من المنبع أو الأداء عند كل ملف، ما هو غير تسبيق، يعني فنهاية العام الضريبة غتخلص كلها. إلى جاك مثلا مليون ديال الضريبه فاللاخر ديال العام وأنت خلصتي مسبقا 3000 درهم راك غتزيد 7000 درهم، وإلى كنت خلصتي غير 500 درهم تسبيق أو اقتطاع من المنبع غيخصك تزيد 9500 درهم باش تكمل الخلاص. المهم مليون هو مليون.