گود سبور//
استغراب كبير وسط الإعلام المغربي والجماهير المغربية، اللي كانت كتنسنا ان الناخب الوطني وليد الركراكي، غيدير ندوة صحافية فمركز محمد السادس، باش يشرح اسباب الفشل والإخفاق فكاس افريقيا 2023 فالكوت ديفوار، حتى فاجأهم بحوار مع قناة الرياضية.
الشارع الرياضي المغربي كان كيتسنا تعلن الجامعة الملكية المغربية لكرة القدم عن تنظيم ندوة صحافية بحضور مختلف وسائل الاعلام الوطنية، بطلب من الناخب الوطني وليد الركراكي ويتلقى فيها أسئلة مختلف الصحافيين باش ينقلو له استفسارات الشارع الرياضي المغربي والمواطن المغربي اللي كان كيتسناه يرجع بكوب دافريك او على الاقل يدير دومي فينال بمنتخب مغربي مشكل فالأغلب ديالو من لاعبين كيتعتابرو نجوم فأندية أوروبية كبيرة.
الناخب الوطني وليد الركراكي اختار العكس، وقرر يخرج فحوار مريح مسجل على قناة الرياضية “الله وعلم امتى المهم انه جا من بعد نكبة الكوت ديفوار” وغيدوز اليوم الجمعة فالليل، باش يخرج يقول داكشي اللي عندو على اسباب الاقصاء، بحضور صحافي ولا جوج من قناة واحدة، وطبعا مع احتراماتنا لقناة الرياضية والصحافي اللي غيدير الحوار، ولكن واش ما كانش من الأفضل تكون ندوة صحافية وبحضور جميع وسائل الاعلام الوطنية والصحافيين اللي تكبدوا عناء السفر مع المنتخب المغربي للكوت ديفوار فوفد الاعلامي كيتجاوز العدد ديالو 109 صحافي، لنقل كل كبيرة وصغيرة على ليكيب ناسيونال للجماهير المغربية، باش يشاركوا زملاءهم فقناة الرياضية طرح الاسئلة الموضوعية حول أسباب فشل وليد الركراكي مع المنتخب المغربي فكوب دافريك 2023، بعد الإنجاز التاريخي فكوب ديموند 2022، وطبعا راه فاختلاف الاسئلة وزوايا المعالجة ديال الصحافيين والخطوط التحريرية ديال المنابر افادة لا للمتلقي باش يوصل لخلاصة لشنو وقع فكوب دافريك ولا للركراكي براسو باش يجاوب على مختلف تساؤلات الشارع الرياضي المغربي.
وليد الركراكي وعكس الناخب الوطني السابق البوسني وحيد حاليلوزيتش، اللي كان عقد ندوة صحافية بعد اقصاء المنتخب المغربي من ربع نهائي كاس أفريقيا الكاميرون 2021، قرر بعدما جددت فيه الجامعة الملكية المغربية لكرة القدم برئاسة فوزي لقجع، وبعد تقريبا 2 سيمانات يخرج يطل على المغاربة ومن نافذة واحدة ديال قناة الرياضية، هذا الشي مزيان على انه جاتو فكرة التواصل مع الجماهير، ولكن راه الجمهور حتى هو ذكي والجيل ديال الديجيتال والريزو سوسيو والفيسبوك والإنستغرام ماشي هو جيل RTM و 2M وحتى الأمور تغييرات، يعني حتى طريقة التواصل فالإخفاق والفشل خاصها تكون بحال طريقة التواصل فالنجاح وملي كيكون الإنجاز، والسؤال اللي كيتطرح هنا واش وليد الركراكي بالخروج ديالو المسجل على قناة الرياضية غيقدر يقنع المغاربة أو لا، حيث الجمهور المغربي باغي نقاش وباغي اسئلة مختلفة كتطرح باش يحس ان الركراكي جاوب على داكشي اللي كيحس به كل مغربي بعد صدمة الإقصاء من ثمن نهائي كوب دافريك، زعما الركراكي غيدو يقنع 35 مليون مغربي كل واحد فيهم عندو انتماء كروي معين وكيجمعهم حب المنتخب المغربي، بالمبررات ديال فشل الأسود فالكوت ديفوار؟ هذا هو السؤال اللي صعيب يجاوب عليه الركراكي براسو.