سهام البارودي – كود//
العلاقة د المغاربة بالزواج راه علاقة فريدة من نوعها ! عكس لي يمكن تلقاه فشي بلدان اخرى، المغاربة كايتزوجو بسهولة كبيرة و كاتخلع گاع ! اسهل حاجة يمكن ديرها فالمغرب هي تنوض تجوج ! شفتي لاقاليك راسك نوض تجوج و الله اما كاينة شي حاجة لي تقدر تمنعك ! باش تشري دار مثلا خاصك الفلوس ، باش تكري خاصك الفلوس، باش تخدم خاصك تقرا و لا تكون عندك شي حرفة و لا شي مهارة و تقلب على خدمة و تبدل مجهود بدني و عقلي و شوف تشوف واش تلقى خدمة ! فريتة لابغيتي تاكلها غايخصك تشري البطاطا و تقشرها و تطيبها فالزيت عاد تاكل الفريتة و لكن الزواج ! لا ! الزواج اسهل من الفريت غا تلاقا مع شي وحدة و جيبو ليكارط و سيرو تجوجو ! ساهلة ! كون احمق كون شمكار كون مضطرب نفسي كون حشايشي كون مبلي كون قتّال كون بيدوفيل … كلشي كايتجوج فالمغرب ! راه بنادم داخل خارج للحبس و لادويتي معاه كايقوليك ” لا صافي الحمد لله دابا تجوجتش درتش وليداتش حتى انا” ! الزواج هوا واحد الطقس كايمارسو المغربي باش ينتامي للجماعة !
و بالعكس راه تبقى بوحدك مامجوش هي لي صعيبة فالمغرب ! اما الزواج كلشي غايساندك فيه العائلة، الجيران ، الصحاب، الدين ، الدولة ، واخا تكون گاع مقودة عليك ! كايقوليك خدوهم فقراء يغنيهم الله من فضله ! واخا تكون مگرد گاع تجي شي جداك عندها غا ناب دَافع عليك قدام دار المرا ” ولدنا يونس راه بدراعو “زعما واخا تشوفو مفضّي ولكن نشاعالله فاش كايتجوج غايسخر دوك اليدين فشي خدمة اخرى ! و كلشي كايعاونك على الجواج الجيران يعطيوك السدادر و الطباسل لاقلتي ليهم عندي العرس و لكن باش تجيب صاحبتك و تجلسو في جو رومانسي فالدار ديك الساعة نفس الجيران غايسيفطو ليك بّاهم لابس غا گرصون كاشف و بيل سماطي يقوليك ” خرج ديك الموسخة و لا غانجيب ليك البوليس راه ماعدناش البورديل ! عائلات هنا ! حطارمونا”
حتى الحمّاق كايتجوجو عندنا ! المرضى العقليين و النفسيين ! كاتلقاه عندو شي مرض نفسي مقود ! و مّو كاتقوليهم ” نجوجوه يدير عقلو ” فحالا المهبل د المرا كايسيل بالزيبام ” ! كايخطبو ليه شي درويشة و كايديرو ليه العرس و يعطيوه شي بيت معاهم و يسيفطوه يضبّر على راسو لي جابها رباح ، يساهم معاهم غا بخمسة دراهم عشرة دراهم فالنهار و يجي يغمس فالمرقة هوا و المرا مرحبا ، كايتجوج و يولد تاهوا و يدير دفتر الحالة المدنية حتى لشي نهار كاضور ليه فالخوا كايصبح ذابح عائلتو كاملة مّو و جداه و عمو و مرت عمّو و طبعا حتى المرا و الدراري فحالي وقع فالجديدة هادي شي ثلت سنين و لا ربعة ماعقلتش ! فاش جات الكاميرا كاتسول كايقولو ليها ناس الدوار ” كان درويش ماكايهضرش” غا الدار و الخدمة الخدمة الدار ! تهضر معاه مايجاوبكش ! هههههه وا راه احمق هذا آ عباد الله لي ماكايهضر ماكايتكلم ماعندو حياة ماعندو هوايات ماعندو اصدقاء راه احمق ! و لكن المغاربة عندهم احمق واحد هوا لي كايتسارى عريان فالزنقة و كايشير بالحجر ! ما عدى هاد الاحمق كلشي خاصو يتجوج!
طبعا كاينين ناس ماكايتزوجو حتى كايفكرو و كاينين ناس كايشوفو الزواج مسؤولية مادية و معنوية ، و كاينين ناس واعيين بالقرار ديال الزواج … و لكن شحال هوما ؟ عشرالاف ! عشرين الف ! مليون ! خمسة ؟! كايبقاو قلّة قليلة ! لي فعلا كاتجوج و لي فعلا كاتبني الزواج ديالها على قرار عقلاني وواعي و مسؤول ! أما الاغلبية راه غا كايقيم و يجر مّو من جلابتها يديها تخطب ليه !