هناء ابو علي – كود الرباط ///
وزيرة وزيرة التضامن والإدماج الاجتماعي والأسرة، عواطف حيار، ديما اور جوه. ديما عايشة فعالمها. اليوم الأربعاء فالرباط دارت تصريح للصحافة بخصوص الحكم الصادم على مغتصبي طفلة تيفلت. قالت للصحافة هامش توقيع اتفاقية شراكة بين الوزارة وصندوق الإيداع والتدبير، باللي المغرب عندو منظومة قضائية قوية.
اييه قوية، شكون قالها ليك. وغير كوني تحشمي وتعملي من زميلك فالحكومة وزير العدل اللي قال خاص القوانين تتغير. كيفاش وزيرة للاسرة فرحانة بقوانين كيعطيو عامين لمغتصب. فين عايشة هادي.
ما قالت والو فتصريحها. كان صادم بحال الحكم المتخلف على الطفلة المغتصبة. قالت باللي النيابة العامة قامت باستئناف الحكم القضائي الابتدائي وباللي تايقة منظومة العدالة في المغرب. وا تي اش من ثقة. راه قاضي حكم ابتدائيا على مغتصبي الطفلة باحكام خلات بلادك شوهة. واش انتي فهاد العالم
ثم علاش كتسابق وكتقول راها دارت لجنة فيها 3 اخصائيات اجتماعيات ونفسيات باش يتلاقاو مع البنت والعائلة. راه وزير العدل سبقك وقال هاد الشي وكلف مساعدات بهاد الشي.
انتي وزيرة المرأة تصريحك شوهة ليك ولحزبك ولحكومتك ولبلادك.
كون غير دخلتي سوق راسك وقلتي فقط باللي الاسرة غادية تستافد من برنامج التمكين الاقتصادي للاسرة باش تخرج عائلتها من الهشاشة. كولي هادي وسكتي. گاليك ثقة فالقضاء. لاواه….