كود هناء ابو علي ////
اليوم الجمعة 4 اكتوبر 2024 حكمات محكمة العدل الاوربية فقضية الاتفاقيات التجارية الموقعة بين المغرب والمفوضية الاوربية واللي كتهم الفلاحة والصيد البحري. المحكمة رفضات طعون المفوضية ومجلس الاتحاد الاوربي٬ وقررات الغاء هاد الاتفاقيات لانها كتشمل الاقاليم الجنوبية بالمغرب اي الصحراء الغربية فالجنوب المغربي.
هنا المغرب خاصو يلعبها كبير. يوقف جميع الاتفاقيات. فرصة باش تكون مراجعة شاملة لجميع الاتفاقيات. هاديك الاتفاقيات كانت دارت قبل ما يحدد رئيس الدولة الاطار العام للسياسة الخارجية. سيدنا قال فخطاب ثورة الملك والشعب 20 غشت 2022 باللي ملف الصحراء هو النظارة اللي كيشوف بيها المغرب للعالم. وباللي هاد الملف “هو المعيار الواضح والبسيط، الذي يقيس به صدق الصداقات، ونجاعة الشراكات”. قال بالحرف “أوجه رسالة واضحة للجميع : إن ملف الصحراء هو النظارة التي ينظر بها المغرب إلى العالم، وهو المعيار الواضح والبسيط، الذي يقيس به صدق الصداقات، ونجاعة الشراكات”.
وهدر على بحال الاتحاد الاوربي ودول اخرى بلا ما يذكر اسمهم “ننتظر من بعض الدول، من شركاء المغرب التقليديين والجدد، التي تتبنى مواقف غير واضحة، بخصوص مغربية الصحراء، أن توضح مواقفها، وتراجع مضمونها بشكل لا يقبل التأويل”.
هاد الوضوح اللي جا فهاد الخطاب خاصو يبان اليوم فموقف المغرب من هاد الحكم.
يمكن للمغرب اليوم يعلن تعليق جميع الاتفاقيات خاصة اللي كيهم الهجرة والتعاون الامني مع الاتحاد الاوربي.
ورقة الهجرة ورقة مهمة فيد المغرب. يلعب بيها اليوم ولكن بذكاء بلا ما يضر الصبليون الحليف والصديق اللي فهمات كلام سيدنا واعترفات بمغربية الصحرا. بلا ما يضر فرانسا اللي مشات ابعد شوية وغادية تزيد تمشي فالمسقبل باش تفتح قنصلية فالصحرا.
