كود كازا ///
ما مفهوماش ديك الكلمة اللي جات فبيان الوكيل العام لد محكمة الاستئناف بتطوان بخصوص فضيحة صور مغاربة بغاو يحرگو وعريانين ولابسين كيلوطاتهم ومريحين فالارض واثار الضرب على ظهرهم وحداهم القوات المساعدة.
الغرابة فبيان خرج هادي شوية هو “لباس السباحة”. البيان قال “على إثر تداول بعض مواقع التواصل الاجتماعي لصور بعض الأشخاص بلباس السباحة يجلسون على الأرض وبعضهم الآخر قبالة حائط إسمنتي، أعلن الوكيل العام للملك لدى محكمة الاستئناف بتطوان أن النيابة العامة أمرت بفتح بحث قضائي في الموضوع للوقوف على مدى صحة هذه الوقائع وخلفيات نشر تلك الصور عهد به للفرقة الوطنية للشرطة القضائية”
واضاف البيان انه “سيتم ترتيب الآثار القانونية اللازمة على ذلك فور انتهاء الأبحاث مع إشعار الرأي العام بنتائجه”
هادا هو البيان٬ نرجعو لجملة “صور بعض الاشخاص بلباس السباحة يجلسون على الارض”. وا السي الوكيل العام هادوك ما كانوش كيعومو. ما كانوش مخيمين. هاداك راه ماشي لباس السباحة. مايو العومان راه معروف. هاداك يا السي الوكيل العام راه كيلوط.
الداخلية كانت قالت عبر عمالة المضيق وخرج هاد الشي ف”كود” باللي الصورة عندها 10 ايام وهي صورة حقيقية ماشي مزيفة وباللي هادو كانو فالما٬ حسب رواية الداخلية٬ باغيين يدخلو لسبتة. وباللي القوات المساعدة حبساتهم ومنعاتهم
بالنسبة لاثار الضرب اللي بانت فالصورة ما ذكرهاش البيان اللي اكتفى بالقول باللي تم فتح بحث قضائي للوقوف على مدى صحة هذه الوقائع” بلا ما يشرحو هاد “الوقائع”
