كود – كازا ///
قالت تقارير إخبارية، أن أحفاد اليهود المغاربة تكبو على قنصليات المملكة وباغين جنسية جدودهم من خلال التقدم بطلبات للممثليات القنصلية والدبلوماسية المغربية في الخارج للحصول على الجنسية المغربية.
هاذ المعلومات أكدها سيرج بيرديگو ف مقابلة مع موقع “ميديا 24” أمين عام مجلس الطوائف اليهودية بالمغرب، قال ف التصريح ديالو: “مواطنين من إسرائيل وأوروبا وأمريكا وكندا، كلهم من أحفاد اليهود المغاربة اللي غادرو المغرب بعد الاستقلال، خاصة من الجيل الثاني والثالث من المغتربين اليهود من أصل مغربي، كيتوافدو على القنصليات المغربية ف الخارج وكيتقدمو بطلبات للحصول على الجنسية المغربية”.
وحسب المصادر ذاتها، ف مجموع اليهود اللي من أصل مغربي ويقدرو يتقدمو بطلبات للحصول على الجنسية المغربية يقدر يوصل لـ مليون شخص ف إسرائيل وأوروبا وكندا وميريكان وما عليهم غير يثبتو أن الأباء والأجداد ديالهم مغاربة سواءا دفتر قديم للحالة المدنية أو لاكارط ناسيونال أو باسبور قديم.
وبالنسبة للأشخاص اللي معندهمش الوثائق المذكورة سابقا، خاصهم يتوجهو للغرفة العبرية ف ابتدائية كازا باش يقلبو ف الأرشيف على وثائق مدنية بحال شهادة الاعتراف بنسب اليهودي المغربي لمقدم الطلب، وهو الإجراء اللي يقدر يستمر لمدة 6 أشهر، حسب المصادر ذاتها.