كود بني ملال//
في متابعة “كود” للانتخابات الجزئية لي غاتكون يوم 27 أبريل المقبل، على المقعد البرلماني لي مشا لأحمد شدا القيادي بحزب الحركة الشعبية بحكم قضائي من المحكمة . اكد مصدر “كود” ان صحاب السنبلة ببني ملال مامفاكينش وباغيين يحافظو على المقعد مهما كلفهم الامر ، الا انه، فيه تاهو تنافس كبير مابين الوافد الجديد الشاب عمر ريحان نائب رئيس المجلس الاقليمي ببني ملال، وايضا عبد العزيز الشرايبي احد القادة البارزين في حزب السنبلة ولي يقدر يترشح ومقربين منو ماستبعدوش هاد الاحتمال.
ويقول مصدر “كود” بلي فدرالية اليسار فبني ملال حتى هي غادي تاتنافس على هد المقعد ويقدر يرشحو رشيد مشيش لي كان قاب قوسين او ادنى من الفوز بمقعد برلماني فالانتخابات السابقة قبل ما تظهر نتائج التصويت كاملة وتفوز عليه مريم وحساة لي مشات من البام الى التقدم والاشتراكية. ويقدر ايضا يرشحو محمد جلال الرئيس السابق لجماعة قصبة تادلة، حيث هاد القيادات ديال اليسار ، يقول المصدر ذاته، مفاهمين ومايلقاوش مشكل فتقديم المرشح المناسب.
ويختم مصدر”كود”، بلي باقي الاحزاب فبني ملال منهم حزب الوردة لي دارو اجتماع مع المنسق ديالهم الجهوي زوبدي نائب رئيس الجهة ولي يقدر يتحالف مع الاغلبية ديال مجلس الجهة لي غاديا في اتجاه تقديم مرشح واحد من الاحرار. وهاد الاحزاب الصغيرة، يؤكد مصدر “كود”، يقدر يخرج منها حتى هي العجب وتقدم متنافسين، ولكن غايكونو ضعاف سواء في ما يتعلق بالقاعدة ديالهم او التمويل ديال الحملات وما تتطلبه من سخاء وتكاليف مالية كبيرة.