كود ـ الرباط//
باش يوفرو هاد العام 50 ألف منصب شغل دائم وماشي مؤقت، ترأس رئيس الحكومة، عزيز أخنوش، البارح الثلاثاء، فالرباط، حفل إطلاق منحة دعم التشغيل اللي كتندارج ضمن تدابير برنامج “أوراش 2”.
وجا فبلاغ ديال وزارة الإدماج الاقتصادي والمقاولة الصغرى والتشغيل والكفاءات، أن منحة دعم التشغيل، كتشكل لبنة أساسية ضمن الإجراءات والتدابير المحددة ف برنامج “أوراش 2” وأن الهدف ديالها هو تمكين الأشخاص اللي كيواجهو صعوبة في ولوج سوق الشغل، خاصة اللي ماعندهمش شهادات، من تطوير تجربة مهنية لمدة ما كتقلش عن 12 شهر، وتعزيز قدراتهم التقنية والسلوكية، والرفع من حظوظ الادماج المستدام ديالهم.
وكيتعتابر هاد البرنامج، اللي جا كتثمين للمكتسبات المحققة فإطار “أوراش 1″، مرحلة جديدة من التعاون بين القطاعين العام والخاص من أجل إضفاء زخم ودينامية جديدة على النشاط الاقتصادي وتثمين الرأسمال البشري.
الحفل اللي حضرو ليه عدد من أعضاء الحكومة، ورئيس الاتحاد العام لمقاولات المغرب، والمدير العام للوكالة الوطنية لإنعاش التشغيل والكفاءات، وممثلون عن الفيدراليات والجمعيات المهنية، وفاعلون مؤسساتيون من القطاعين العام والخاص، عرف التوقيع على العديد من الاتفاقيات اللي كتهدف لخلق أكثر من 50 ألف منصب شغل مستدام برسم سنة 2023.
هاد المناصب كتخص بالأساس الأشخاص للي ماعندهمش شهادات وذوي الصعوبة في ولوج سوق الشغل والمهاجرين فوضعية نظامية، وكتنضاف إلى 100 آلاف منصب للي غادي يتم توفيرها ضمن أوراش مؤقتة وغادي تكون الحكومة وفرات 150 ألف منصب شغل ف هاد السنة.
