كود الرباط//
بحال جميع الفرق البرلمانية فالغرفة الثانية، كاين صراع على المناصب فأجهزة وهياكل المجلس بين مرشحين كيحاولو يضمنو ليهم بلاصة خلال محطة تجديد هاد الهياكل.
من بين الفرق لي شاعلة فيها القضية مزيان، فريق الحركة الشعبية لي كيتصارعو فيه أربعة مرشحين عن منصب الخليفة الرابع لرئيس المجلس: المهدي عثمون لي كان دوز النصف الأول وباغي مازال يزيد، يحفضو بنمبارك المرشح الصحراوي من الداخلة لي كان تعطا ليه وعد ف 2021 بلي نوبتو غا تجي ف 2024، ونبيل اليزيدي لي خدام مزيان فالمجلس، والأخير عبد الرحمان الإدريسي لي ترأس لجنة التعليم في النصف الأول.
كل الحظوظ بجانب يحفضو بنمبارك واخا علاقتو جد متوثرة مع الأمين العام للحزب محمد أوزين لي كيفضل يرجع عثمون لبلاصتو واخا أن الأخير سبق في شتنبر 2023 أن قضت غرفة الجنايات الابتدائية المكلفة بالجرائم المالية لدى محكمة الاستئناف بالدار البيضاء بإدانته بثلاث سنوات حبسا نافذا، في ملف متابع فيه رفقة تقننين ومقاولين وموظفين بجماعة خريبكة، بتهم تبديد واختلاس أموال عمومية.
هاد الصراع غا يتحسم خلال جلسة انتخاب هياكل مجلس المستشارين للي غاتكون يوم السبت 12 اكتوبر الجاري.
