كود تطوان//
هاذ الضسارة ديال شي سائقي سيارات ما بغاتش تقادا، ويلا ما كانتش التدخل الحاسم ديال القانون، مشاهد العربدة في الطرقات والشوارع غدا تبقى تتكرر. مشهد من مشاهد هاذ الضسارة جرى اليوم في العشية بشارع القاهرة قرب مطعم سوشي بتطوان اللي معروفة مدينة سياحية وعامرة هاذ الصيف.. يعني الناس خاصها تحترم القانون وتزيد تأخذ حذرها.
لكن واحد فرعون كان عندو رأي آخر، بغى يضرب أسرة كاملة كانت قاطعة الطريق في أمان الله من ممر الراجلين، ومني بغى رب الأسرة ينبهو، ثار في وجهو ونزل من السيار اللي كتحمل ترقيم G005NHبغى يتعدى عليه، وسبو بكلام خايب قدام الأسرة ديالو، وهو كيدعي علاقة بجهات نافذة.
وهاذ الواقعة أكيد سجلاتها كاميرات المراقبة في المكان، وكاين حتى شهود عيان كانو لحظة محاولة الاعتداء، وبعض النادلين ديال المقهى للي تدخلو باش ما تتطورش الأمور.
دبا هاذ البسالة ولينا كل مرة كنشوفوها، حيث هاذ التافهين باردين الكتاف كيتعناو بعلاقات والديهم وعلاقاتهم، ويخلعو عباد الله ويتعداو عليه، ويلا ما دخلتش السلطات الأمنية والقضائية باش تضرب بيد من حديد غادة تولي السيبة فطرقات المغرب، خصوصا في هاذ الأوقات اللي كنحاولو نروجو فيها للسياحة الداخلية والخارجية، ولكن عندنا ضاسرين كيتساراو دون حسيب ولا رقيب في الطرقان وخاص للي ربيهم.