كود كازا ///
البارح الجمعة 30 غشت 2024 بريسطو “براساريا” فالمعاريف حدا توين سانتر فكازا كان مسموح لشركة “ايكوس” ماشي غير تبيع الكارو الالكتروني بل مسموح لهاد الماركة ديال “فيليب موريس” دور على الطوابل. سواء كان الزبون كيكمي او ما كيكميش٬ كانت جوج شابات كروج وتسوق ودير الدعاية لهاد المنتوج واخا القانون المغربي واضح. ممنوع تسويق ودير الاشهار للسجائر كيف ما كانت.
هاد الضصارة ديال “ايكوس” كبرات بزاف بزاف مؤخرا وتسويقها كيتحدى السلطات بتواطؤ مع مهرجانات بحال “دجازا بلانكا” فكازا اللي عطاوهم ستاند كبير وسمعو ليهم يبيعو ويديرو الاشهار ويقلبو على زبناء جداد.
وفاخر يوليوز وكيف عاينات “كود”٬ كانو هاد الناس ديال “ايكوس” كيدوزو علي لقهاوي وسط كازا وكيديرو الاشهار لهاد الكارو.
دابا ولاو كيختارو حتى المطاعم فمدن مغربية وبحال البارح فكازا كان بدعم من رئيس الباطرونا شكيب لعلج. حقاش هاديك براساريا مطعم ديالو مع شريكو المسفيوي.
دابا محتمل تلقى هاد ايكوس فالثانويات مادام السلطات ساكتة على هاد الخرق للقانون
منظمة الصحة العالمية كانت فندات ما سمته “الادعاءات المتعلقة بسلامة السجائر الإلكترونية وفعاليتها في الإقلاع عن التدخين” وقالت باللي هاد الشي “لا أساس لها من الصحة في الأدلة العلمية”. واكدات باللي “السجائر الإلكترونية تحتوي على النيكوتين، وهو عنصر ضار ويسبب الإدمان، ويؤثر على نمو الدماغ لدى الشباب”. واضافت “وترتبط السجائر الإلكترونية أيضاً بالإصابات والأمراض، مثل الانفجارات والحرائق، والأمراض المعدية للحلق والفم، والسعال، والغثيان، والقيء. ثقف الناس بالحقائق حول استخدام السجائر الإلكترونية”
