كود ـ كازا//
اللائحة السوداء تاع المنعشين العقاريين اللي غايتبناوها الموثقين في المغرب بخصوص بعض “المنهشين” وصحاب الملاسة تعطلات بزاااف، تصورو كاينين ناس دفعوا الفلوس باش يشريو من شركات عقارية منذ 2018 وباقين إلى يومنا هذا معلقين، كاين اللي ولا تيطالب غير بفلوسو ووالو، بحال البروجي اللي فمراكش وزكاه مولاه بساتين، هاد المنهش قودها فكازا وخلا الناس لا ديدي لا حب الملوك، ومشا لمراكش ودار نفس الشيء. وباز.
المصيبة أنه باع للناس شقة موايان ستاندينغ وملي بغاو يكتبو، قال ليهم جيبو شهادة عدم الملكية، بغا يدوزها عليهم وعلى الضرائب وعلى الدولة. دابا هو شاد أكثر من 50 مليون في البرطمة، وبغا يصوب ليهم عقد ديال السكن الاجتماعي 25 مليون، ملي عاقو الناس واحتجو، خصوصا أن ضمنهم اللي عندو الملك ومايمكنش يستافد من الدعم، بدا في التسويف وزيد عليهم الفلوس، أكثر من هذا دار شي التزامات باش يراوغ الضرائب وسماها القيام بإصلاحات.
كاين عدد من المنعشين اللي تلاحو على المهنة باش يشوهوها، ولكن كاين حتى بعض الموثقين اللي سببوا أزمات، وشي هرب للخارج وشي تخبى حتى قرقبوا عليه. وهادشي اللي خلا فدرالية المنعشين تقول بلي خاص اللائحة يكونو فيها حتى الموثقين اللي مشبوهين.
