كود كازا//
قرر مجلس مدينة الدار البيضاء برئاسة نبيلة الرميلي تأسيس شركة تنمية محلية تابعة للجماعة، باش تتكلف بصندوق الأشغال اللي كانت كتشرف على التدبير ديالو شركة ليديك ديال الضو والما، وهذا الشي جا بقرار من والي جهة الدار البيضاء- سطات اللي أكد أن جماعة كازا خاصها تاخذ تدبير الصندوق من الشركة المذكورة.
وحسب وثيقة توصل بها موقع “كود”، راسلت نبيلة الرميلي عمدة كازا، أعضاء جماعة الدار البيضاء من أجل إضافة نقطة “الدراسة والتصويت على ميثاق المساهمين والوثائق التأسيسية لشركة التنمية المحلية المكلفة بتدبير صندوق الأشغال”، إلى جدول أعمال الدورة العادية لشهر ماي الحالي الخاصة بمجلس المدينة.
مصدر داخل مجلس مدينة الدار البيضاء، كشف لـ”كود” أسباب هذا القرار، وأوضح أن صندوق الأشغال تخلق عام 1997 ملي وقعت المجموعة الحضارية مع شركة ليديك وعطاتو لها، وكيتم ضخ فيه ملايير الدراهم من أجل الاستثمار في البنيات التحتية بخصوص الماء والكهرباء والمياه العدمة وتطهير السائل”.
وأضاف نفس المصدر، أن تدبير الصندوق ظل عند شركة ليديك، ولكن بقى هذا الشي فيه غموض حيث نفس الشركة هي المسؤولة على توزيع الماء والكهرباء بكازا وفي نفس الوقت هي اللي كتستثمر بهذا الصندوق وحتى جماعة كازا صعيب عليها تراقب إدارة ليديك، داكشي علاش صعيب تعرف واش صندوق الأشغال تم الاستثمار ديالو لتنفيذ الأشغال المذكورة المخصص لها أو لا.
المصدر أكد أن هذا القرار هو اقتراح جا من والي الجهة، وكينص على أن صندوق الأشغال خاصو يتحيد من تحت الاشراف ديال شركة ليديك، ويرجع لجماعة الدار البيضاء تشرف عليه من خلال الآليات ديالها وهنا غيتم خلق شركة التنمية المحلية من أجل تدبير صندوق الأشغال.
