كود سبور//
أكد الناخب الوطني وليد الركراكي أنه ماشي من الساهل يلعب المنتخب الوطني المغربي جوج ماتشات متابعين فظرف 3 أيام، كيفما وقع ضد منتخب إفريقيا الوسطى برسم إقصائيات كاس أفريقيا 2025، واخا الأسود ربحو الماتش الأول بـ5 والثاني بـ4، وقال أنه يحسب للمنتخب أنه جمع معدل النقاط اللي تأهلو كرويا إلى كوب دافريك ولو أنه مؤهل ديجا للبطولة حيث هو البلد المنظم.
وبعدما ربح المنتخب الوطني المغربي، أفريقيا الوسطى بنتيجة 4 لزيرو، قال الركراكي فتصريح له: “ماشي ساهل تلعب بنفس الفريق 2 مرات فثلاثة أيام، كنا باغيين نماركيو اكثر، الريتم فالعشرين دقيقة الأولة باش كنا لاعبين كان ناقص وما عجبنيش وملي طلعنا الريتم ديالنا قدرنا نماركيو”.
وكمل الركراكي “دخلنا لاعبين جداد باش حتى هوما يشمو ريحة المنتخب ودنا بون سطاج، عندنا 12 نقطة، وتأهلنا دابا رسميا لكوب دافريك، واخا حنا راه ديجا مكاليفيين حيث حنا البلد المنظم، ولكن حنا كانمشيو باللعب وجمعنا 12 نقطة على 12، وغانزيدو للقدام”.
وختم الركراكي: “بغيت نشكر الجمهور اللي كان اليوم فالماتش، برافو الوجديين وناس الشرق، شجعونا وكانو ورانا حسينا بهاد الشي وخاصهم يبقاو ديما هاكدا، والمنتخب بقى هاكدا مع اللاعبين اللي باقيين صغار وباغيين يديرو شي حاجة كبيرة”.
