كود سبور//
نفى محمد الشرقاوي رئيس اتحاد طنجة، وفاة شي لاعب من اللاعبين ديال الفريق المفقودين فالبحر، وهذا الشي إلى حدود الساعات الاولى من صباح اليوم الاحد، مع العلم انه تم إنقاذ 3 أشخاص من أصل 5 أشخاص كانوا فرحلة ترفيهية على متن يخت سياحي فبلاج ريستينگا، 4 من هاد الخمسة لاعبين فاتحاد طنجة وواحد صاحبهم منخرط هو الخامس.
وبعد انتشار معلومات على مواقع التوصل الاجتماعي كايقولو ماليها ان لاعب اتحاد طنجة عبد اللطيف اخريف فارق الحياة فالبحر، خرج محمد الشرقاوي وقال على الصفحة ديالو ففيسبوك: “مازال البحث جار عبد اللطيف اخريف وسلمان الحراقي”.
وطلب الشرقاوي الكف عن نشر الإشاعات خصوصا وان الضحايا عندهم العائلات ديالهم اللي كايعانيو بزاف بسبب الإشاعات، وأحد: “مازال ما كاين لا جثة لا والو ومازال فرق الإنقاذ مستمرين كايقلبو عليهم”.
وكمل الشرقاوي: “الدرك الملكي دار الواجب ديالو عتق 3 ديال الشبان وباقيين 2 ومازال الدرك الملكي ولامارين كايقومو بالواجب ديالهم وغايبقاو كايقلبو حتى الصباح وحنا غانبقاو هنا نتسناو شي خبر مزيان”.
