گود سبور//
اختارت العصبة الوطنية لكرة القدم الاحترافية المواعيد الجديدة للماتشات المؤجلين للفراقي اللي مشاركين فالمسابقات القارية، عن الدورتين 10 و11 من البطولة الاحترافية.
وعاودت العصبة الاحترافية برمجت الماتشات المؤجلين عن الدورة 10 ما بين فاتح أبريل و3 من نفس الشهر، وغايلعبو نهضة بركان ضد أولمبيك اسفي يوم الاربعاء 1 أبريل فتيران المسيرة الخضراء فأسفي مع 8 الليل، ويوم الخميس 2 أبريل لاعبين الجيش الملكي ضد أولمبيك الدشيرة مع 8 الليل فتيران مولاي عبد الله فالرباط، والفتح الرياضي لاعبين ضد الوداد الرياضي يوم الجمعة 3 أبريل مع 8 الليل فتيران مولاي الحسن بالرباط.
أما الماتشات المؤجيلين عن الدورة 11، عاودت برمجتهم العصبة الاحترافية، ما بين السبت 4 أبريل والاثنين 6 من نفس الشهر، والبداية باتحاد يعقوب المنصور وأولمبيك آسفي يوم السبت 4 أبريل مع 8 الليل فالتيران الأولمبي بالرباط، ونهضة بركان والمغرب الفاسي يوم الاحد 5 أبريل مع 6 العشية فتيران بركان، ونفس اليوم فيه ماتش الكوكب المراكشي ضد الجيش الملكي مع 8 الليل فالتيران الكبير لمراكش، والاثنين 6 أبريل مع 8 الليل، لاعبين الوداد الرياضي ضد الدفاع الحسني الجديدي فستاد دونور.
هاد الماتشات خلقو أزمة فالبرمجة خصوصا وأن البطولة خاصها تسالي بكري هذا الموسم حيث كاين كأس العالم، وكانو مؤجلين حيث الوداد وليفار وبركان وآسفي كانو لاعبين دوري أبطال أفريقيا وكأس الكونفدرالية الإفريقية، وملي كثرو المؤجلات ديالهم راسلو المنافسين ديالهم فالبطولة الرجا والمغرب الفاسي العصبة الاحترافية وقالو لهم يطبقو القانون وأنه بعد نهاية مرحلة الذهاب ما يتلعبو ماتشات الإياب حتى يلعبو گاع الأندية اللي عندهم ماتشات مؤجلين المؤجلات ديالهم، وقفت العصبة البطولة حتى يلعبو الأندية المشاركين فالمسابقات القارية ربع النهائي ديالهم فهاد المسابقات بجوج، ومن وراها راسلو الوداد العصبة وطلبو منهم يطبقو القانون وما يبرمجو لهم حتى شي ماتشات فالتوقف الدولي حيث الفريق الأحمر عندو كثر من 3 اللاعبين فالمنتخبات الوطنية ديالهم، واضطرت العصبة لتأجيل المؤجلات حتى لما بعد التوقف الدولي.