گود سبور- ميريكان//
خرج السويسري جياني إنفانتينو رئيس الاتحاد الدولي لكرة القدم يطفي العافية، وينفي أن لابيل د التيليفون اللي كانت بينو بين رئيس ميريكان دونالد ترامب، كانت بغرض يحيد البطاقة الحمرا للاعب ميريكان فولارين بالوگون اللي كان خداها فالثمن ضد المنتخب البوسني، وحيدوها له الفيفا قبل من ربع النهائي المرتقب ضد بلجيكيا وهذا الشي نوض النحل.
ونشر إنفانتينو بيان وضح فيه وقال: “شفت التعليقات العامة على قرار لجنة الانضباط المستقلة التابعة للفيفا والمتعلق بإيقاف فولارين بالوگون، وبغيت نأكد تاني على مبدأ أساسي من مبادئ حوكمة الفيفا، وهو أن الهيئات القضائية التابعة للفيفا مستقلة، وهي كاتخدم بشكل مستقل، وكاتطبق مدونة الانضباط الخاصة بالفيفا، وتفصل فالقضايا بناءً على اللوائح المعمول بها والحقائق المحددة المعروضة أمامها. واستقلالها ضروري لمصداقية ونزاهة كرة القدم، وخاص احترام هذا الشي ديما”.
وأكد إنفانتينو أنه هضر فالتيليفون مع ترامب، وقال: “وي كاناقش بانتظام الأمور المتعلقة بكأس العالم مع رئيس الولايات المتحدة، وفهاد الشي جاتني أبيل من الرئيس دونالد ترامب، كيفما كايجيوني ليزابيل من رؤساء دول ومسؤولين حكوميين وأصحاب مصلحة فكرة القدم ومديري أعمال من جميع أنحاء العالم بشأن العديد من القضايا المختلفة، وفهاد لابيل، وضحت أنه كاينة عملية قانونية خدامة كاتشمل الهيئات القضائية المستقلة للفيفا، وأن القضية سيتم البت فيها فالوقت المناسب من قبل الهيئات المختصة، وهاكذا كايخدم نظام الفيفا، وهذا مبدأ غادي نلتزم به ديما”.
وكمل انفانتينو، ونفى التدخل فقرارات لجان الفيفا، وقال: “كانقرا قرارات لجنة الانضباط فالفيفا ملي كاتصدر، وكاين شي مرات كانتفاجأ بها، وفشي مرات كانتفق معها وشي مرات كانختلف معها”.
وزاد اكد: “اللي كاندير ديما هو احترام هاد القرارات واستقلالية الهيئات اللي كاتخدها، سوا عجبنا القرار شخصا ولا ما عجبناش، وراه احترام المؤسسات المستقلة وسيادة القانون وهما اللي كايحميو نزاهة مستقبلنا ومصداقية الفيفا ديما”.