گود سبور//
تفارق الدولي الهولندي محمد احتارين اللي من أصول مغربية، مع فريق سلافيا براگ التشيكي، اللي ما لعب معه حتى شي ماتش.
وعلن سلافيا براگ التشيكي، أنه اتفق مع محمد احتارين باش يساليو العقد اللي ما بينهم، حيث اللاعب قالهم أنه باغي يرجع يلعب حدا عائلتو فهولندا.
محمد احتارين اللي فضل يلعب لهولندا واخا الأصول ديالو مغربية، كان من المواهب اللي كلشي كان كيتنبأ لها بمستقبل كبير، ولكن خرج عليه المحيط ديالو، وراه كان فشحال من مناسبة غيتشد لقضايا مختلفة حسب الإعلام الهولندي.
وسبق لمحمد احتارين مول 22 عام ولعب ايندهوفن الهولندي ويوفنتوس الإيطالي واياكس امستردام الهولندي، ولكن ما دارش عقلو فالكورة، واخا حاولو معه هاد الاندية ومن بينهم يوفنتوس اللي عطاوه بزاف ديال الفرص ولكن دون نتيجة.